BMT Bosh Assambleyasining 81-sessiyasi 8-sentabrdan boshlangan, 29-sentabrga qadar davom etadi. Oliy haftada esa doimgidek aʼzo mamlakatlardan prezident, bosh vazir, tashqi ishlar vazirlari hamda hukumat rahbarlari qatnashadi. Oʻzbekiston nomidan Prezident Administratsiyasi rahbari Saida Mirziyoyeva BMT oliy minbaridan nutq soʻzlaydi.
21-sentabr kuni BMT bosh kotibi koʻplab delegatlar qatorida Saida Mirziyoyeva bilan ham uchrashib, muloqot qildi. Dastavval administratsiya rahbari yillik sessiya daftariga imzo chekdi, soʻngra esdalik uchun Guterrish bilan suratga tushdi.
«Oʻzbekiston va BMT birgalikda rivojlantirib kelayotgan barcha hamkorlik yoʻnalishlarini gaplashdik», deydi Saida Mirziyoyeva oʻzining shaxsiy sahifalarida.
Shuningdek, u xavfsizlikning barcha asosiy jabhalarida Oʻzbekistonni qoʻllab-quvvatlab kelayotgani uchun Guterrishga minnatdorlik bildirdi.
Mirziyoyevaning nutqi AQSH vaqti bilan 23-sentabrga toʻgʻri kelishi kutilmoqda. U Nyu Yorkda qator ikki tomonlama uchrashuvlar ham oʻtkazadi.
