Toshkentda avtobus haydovchisining qoidabuzarligi sabab elektrobus texnik shikastlandi

Yashnobod tumani Maxtumquli ko‘chasida 2 ta avtobus to‘qnashishi oqibatida elektrobusga texnik zarar yetdi. Haydovchi oraliq masofani saqlamay transportni to‘xtatgani sabab avtobus qirilgani ma’lum qilindi. Voqeada jarohatlanganlar yo‘q.

Foto: Toshshahartransxizmat

Tarmoqlarda 2 ta Yutong rusumli elektrobus haydovchisining poyga o‘ynagani sabab bir-biri bilan to‘qnashib, oynasini sindirgani haqidagi xabarlar tarqaldi.

Holat yuzasidan “Toshshahartransxizmat” munosabat bildirdi. Unga ko‘ra, voqea 7 fevral kuni soat 11:00 da kuzatilgan. Yashnobod tumani Maxtumquli ko‘chasi bo‘ylab harakatlanib kelayotgan 28-sonli yo‘nalish haydovchisi avtobusni Uspenskiy nomidagi musiqa maktabi bekatiga to‘xtatayotgan vaqtida shu bekatda turib yo‘lovchi tushirayotgan 44-sonli avtobusga texnik zarar yetkazgan.

“44-sonli avtobus bilan yonlama oraliq masofani saqlamagani oqibatida 28-sonli avtobusning o‘rta eshik qismi hamda 44-sonli avtobusning chap tomon orqani ko‘rish oynasining korpus qismi bilan bir-biriga tegib qirilgan”, – deyiladi rasmiy xabarda.

AJ sodir etilgan to‘qnashuvda tan jarohati olganlar yo‘qligini qo‘shimcha qilgan. Hozirda YTH Toshkent shahar Ichki ishlar bosh boshqarmasi Yo‘l harakati xavfsizligi boshqarmasi xodimlari tomonidan o‘rnatilgan tartibda rasmiylashtirilmoqda.

#elektrobus #haydovchi