Yangi bosh qo‘mondon Oleksandr Sirskiy uchun vaziyat ancha og‘ir – G‘arbning yordami keskin kamayib ketgan. Ukraina esa strategik hujum qurollarisiz yerlarini qaytarib ololmaydi. Hozirgi holatda yo Zelenskiy qo‘mondonlik oldiga qo‘ygan g‘alaba qozonish talabini o‘zgartirishi kerak, yoki Ukrainada siyosiy inqiroz kuchayib boradi, deydi siyosatshunos Kamoliddin Rabbimov.
Ukraina qurolli kuchlari bosh qo‘mondoni Valeriy Zalujniy istefoga chiqarildi. Volodimir Zelenskiy general-polkovnik Oleksandr Sirskiyga ishonch bildirdi. Kun.uz muxbiri bu o‘zgarish bo‘yicha savollarga siyosiy tahlilchi Kamoliddin Rabbimovdan javob oldi.
— Prezident Zelenskiy va Zalujniy o‘rtasidagi kelishmovchilikning sababi nima edi?
— Ukrainalik ekspertlar fikriga qaraydigan bo‘lsak, asosan 2 ta fikr aytilyapti: shaxsiy munosabatlar yoki urush bilan bog‘liq harbiy strategik, siyosiy vaziyat. Mening nazarimda, asosiy sabab 2023 yil boshida juda ko‘p aytilgan, lekin muvaffaqiyatsizlikka uchragan qarshi hujum. O‘tgan yili yil boshlarida kollektiv G‘arb Ukrainaga har oyiga 5 mlrd dollardan yordam berdi, ammo yil oxiriga kelib bu 250 mln dollarga tushib qoldi. Yaqin Sharqdagi konflikt boshlangach, kollektiv G‘arb va dunyo hamjamiyatining e’tibori Ukrainadan tortildi.
Ukraina yil oxirigacha G‘arb yordami bilan bosib olingan yerlarni qaytarib olamiz, degan edi. Ammo bu amalga oshmadi. Buning bir qancha sabablari bor. Rossiya tomoni bosib olingan yerlarni saqlab qolish uchun bir necha oy davomida jiddiy tayyorgarlik ko‘rdi va bu o‘z natijasini berdi. Mana shu muvaffaqiyatsizlikdan so‘ng Ukraina siyosiy elitasida inqiroz boshlangan edi. Zalujniyning lavozimidan ketishi haqidagi gaplar 2023 yilning so‘nggi choragida tarqalgan edi. Zelenskiy va Zalujniyning munosabatlari tarang ekani haqida ma’lumotlar tarqaldi. Orada Zalujniyning G‘arb matbuotida bir nechta maqolalari chop etildi va prezident va qurolli kuchlar boshlig‘i o‘rtasidagi urushni olib borish borasidagi tafovutlar yuzaga chiqdi. Zelenskiy siyosatchi sifatida, Zalujniy esa harbiy sifatida fikrladi, ya’ni Zalujniy kerak joyda chekinib, imkoniyat bo‘lganda boshqa joydan zarba berish, yo‘qotishlarni kamroq qilishga uringan, Zelenskiy esa bir qarich yerni ham bermasdan urush olib borish tarafdori bo‘lgani ehtimoli katta.
Oxirgi vaqtlar ikki shaxs o‘rtasidagi ziddiyat tobora kristallashib borayotgan edi. 2-3 hafta oldin Zelenskiy Zalujniyga ishdan bo‘shashini aytgan, ammo u rozi bo‘lmagan, shuning uchun hozir Zalujniy prezident farmoni bilan emas, mudofaa vaziri buyrug‘i bilan ishdan olinyapti.
