Pavel Durov Telegram’ga 10 ta yangi funksiya qo‘shilishini e’lon qildi

Telegram asoschisi Pavel Durov tez orada messenjerda 10 ta yangi funksiya paydo bo‘lishini e’lon qildi.

“Telegram jamoasini yaxshi ko‘raman. Kechagina ilovamizga 10 ta takomillashtirilgan o‘zgarish kiritish taklifini kiritgandim. Shu kunning o‘zidayoq eskizlar tayyor bo‘ldi, bugun qo‘limizda ushbu yangi funksiyalarni o‘zida jamlagan tayyor versiyalar mavjud”, — deb yozdi u Telegram kanalida.

Durovning aniqlik kiritishicha, endilikda xabar yuborilgandan so‘ng unga multimedia fayllari — foto va video qo‘shish imkoniyati bo‘ladi. Bungacha faqat yuborilgan mediafaylni boshqasiga almashtirish mumkin edi, ammo yangisini qo‘shish imkoni bo‘lmagan. Ikkinchi asosiy o‘zgarishga ko‘ra, tahrirlangan xabarlarning tahrir vaqtini ko‘rish mumkin bo‘ladi.

Qolgan beshta yangilanish messenjerdagi sovg‘alarga, uchtasi heshteglarga taalluqli ekani aytildi.

O‘tgan hafta messenjer foydalanuvchilari bir-biriga “sovg‘alar” — xabarga qo‘shish mumkin bo‘lgan animatsiyali tasvirlarni yuborish imkoniyatiga ega bo‘lgandi. Sovg‘ani qabul qilgan shaxs uni o‘z profiliga qo‘shishi yoki sovg‘a qiymatining bir qismini “yulduzchalar”ga almashtirishi mumkin. Durovning aytishicha, keyinchalik bularni tokenlarga (NFT) aylantirish imkoniyati yaratiladi.

Platformada kontent bo‘yicha shikoyat qilish uchun yangi toifalar ham joriy etilgan (masalan, “noqonuniy tovarlar”, “shaxsiy ma’lumotlar”, “mualliflik huquqi”, “firibgarlik yoki spam” kabilar). Shuningdek, iOS tizimida video suhbatlar interfeysi yangilandi.

Sentyabr oyida Durov noqonuniy kontent ustidan shikoyat qilish uchun @SearchReport botini ishga tushirganini e’lon qilgandi. Telegram, shuningdek, “Yaqin atrofdagi odamlar” funksiyasini olib tashlab, o‘rniga “Yaqin atrofdagi bizneslar”ni qo‘shishga qaror qildi, unda “qonuniy, tekshirilgan kompaniyalar” ko‘rsatiladi.