ChatGPT ishida qisqa uzilish sodir bo‘ldi

Chatbotga egalik qiluvchi OpenAI bosh direktori Sem Altman X ijtimoiy tarmog‘iga ChatGPT 30 daqiqa ishlamay qolganini yozib qoldirdi.

Foto: ChatGPT

OpenAI kompaniyasiga tegishli ChatGPT chatboti faoliyatida uzilishlar sodir bo‘ldi va bu minglab foydalanuvchilarga ta’sir ko‘rsatdi, deb xabar beradi Reuters. Ta’kidlanishicha, qisqa uzilishlardan keyin chatbot faoliyati tiklangan.

«ChatGPT bilan bog‘liq muammolar hal etildi», — deyiladi OpenAI bayonotida.

OpenAI bosh direktori Sem Altman X ijtimoiy tarmog‘iga ChatGPT 30 daqiqa ishlamay qolganini yozib, xafa bo‘lgan smaylik qoldirdi: «Ishonchlilik nuqtai nazaridan avvalgiga qaraganda ancha yaxshimiz, lekin bizni oldinda ko‘p ishlar kutmoqda».

Uzilishlarni kuzatish bilan shug‘ullanuvchi Downdetector.com saytiga ko‘ra, ChatGPT servislari bir soatga yaqin ishlamagan va bu 19,4 mingdan ortiq foydalanuvchiga ta’sir ko‘rsatgan.

ChatGPT 2022 yil noyabrda ishga tushirilganidan beri haftasiga 250 million faol foydalanuvchini o‘ziga jalb qildi. 2021 yilda OpenAI qiymati 14 milliard dollardan 157 milliard dollarga chiqib ketdi, daromadi esa noldan 3,6 milliard dollarga yetdi.

Avvalroq ChatGPT tufayli dunyoda energiyaga bo‘lgan talab oshgani ma’lum qilingandi. Qayd etilishicha, ChatGPT orqali qidiruv Google orqali qidiruvdan 10 barobar ko‘p energiyani talab qiladi.