Hindistonda havo ifloslanishi kuchayib ketganidan Toj Mahal ko‘rinmay qoldi

Hindiston hukumati havoning ifloslanish darajasi oshib ketgani sababli Nyu-Dehlida zarur bo‘lmagan obektlar qurishni taqiqladi, fuqarolarni esa uylarni ko‘mir va o‘tin bilan isitishdan voz kechishga chaqirdi. 15 noyabr kuni ertalabdan boshlab shaharda smogga qarshi kurash bo‘yicha yangi chora-tadbirlar amalga oshirilmoqda, deb yozadi Reuters.

So‘nggi bir hafta ichida Shimoliy Hindistondagi havo sifati shunchalik yomonlashganidan, Toj Mahal va Amritsardagi Oltin ibodatxona tutunda ko‘rinmay qoldi. IQAir reytingi ma’lumotlariga ko‘ra, hozirda Nyu Dehlida 255 indeksi qayd etilgan — bu ifloslanish darajasi “o‘ta zararli” ekanini ko‘rsatadi.

Hindiston poytaxtida havo ifloslanishining taxminan 38 foizi sholi o‘rimidan qolgan poyalarni yoqish oqibatida yuzaga keladi. Shahar har qishda smog muammosiga qarshi kurashadi.

Nyu Dehli kasalxonalariga tobora ko‘proq aholi, ayniqsa, bolalar murojaat qilmoqda. Bemorlar yo‘tal, astma xurujlari va allergiyalardan shikoyat qiladi.

Ma’lumot uchun, 16 noyabr holatiga ko‘ra, havosi eng iflos shaharlar ro‘yxatida Pokistonning Lahor shahri yetakchi bo‘lib turibdi, ikkinchi o‘rinni Nyu Dehli, uchinchi o‘rinni Dakka (Bangladesh) shahri egallagan. Toshkent reytingda 34-o‘rinni band etgan.