O‘rta Chirchiq tumanidagi korxonada portlash: 1 kishi vafot etdi, 6 kishi shifoxonaga yotqizildi

5 dekabr kuni soat 07:46 da Toshkent viloyati, O‘rta Chirchiq tumani, «Kim Pen Xva» MFY Qutb Yulduzi ko‘chasida joylashgan ishlab chiqarish korxonasi ma’muriy-xo‘jalik binosida gaz-havo aralashmasining chaqnashi sodir bo‘lgan.

FVVning ma’lum qilishicha, portlash oqibatida 1 nafar fuqaro vafot etgan, 6 nafar fuqaro tan jarohati olib, shifoxonaga yotqizilgan. Hozirda mazkur holat yuzasidan dastlabki tergovoldi surishtiruv ishlari olib borilmoqda.

Ma’lum qilinishicha, voqea joyiga Favqulodda vaziyatlar vaziri general mayor A.X.Qo‘ldoshev yetib borgan hamda uning rahbarligida vaziyat oqibatlari bartaraf etilmoqda. Shuningdek, hodisa joyiga viloyat FVB rahbariyati, tuman hokimiyati, prokuratura, IIB, SSB, «Hududgazta’minoti» rahbar xodimlari yetib borgan. Ayni vaqtda FVVning yong‘in-qutqaruv ekipajlari voqea joyida amaliy harakatlarni olib bormoqda.