AQShda 7 magnitudali zilzila sodir bo‘ldi

Yerosti silkinishlarining episentri Fortuna shahridan 56 kilometr janubi-g‘arbda joylashgan. Kaliforniya shtatida sunami xavfidan ogohlantirish e’lon qilindi.

Foto: NTD

AQShning Kaliforniya shtati shimolida kuchli zilzila qayd etildi va hukumat sunami xavfidan ogohlantirish e’lon qildi, deb xabar beradi Associated Press.

Yevropa-O‘rta Er dengizi seysmologiya markazi ma’lumotlariga ko‘ra, yerosti silkinishlarining episentri Fortuna shahridan 56 kilometr janubi-g‘arbda, 12 ming aholi istiqomat qiladigan hududda sodir bo‘lgan. Zilzila o‘chog‘i 14 kilometr chuqurlikda.

Yerosti silkinishlari San-Fransiskoda ham sezilgan. Asosiy zilziladan keyin bir nechta kichik aftershoklar kuzatilgan. San-Fransisko va Oklend o‘rtasidagi suvosti tunneli orqali harakat to‘xtatilgani aytilmoqda.

AQSh Geologiya xizmati ma’lumotlariga ko‘ra, magnitudasi 7 ballni tashkil etgan zilziladan keyin Kaliforniyada kamida 5,3 million kishi sunami xavfi ostida qolmoqda. Holat yuzasidan «sariq» darajali ogohlantirish e’lon qilingan.