Dortmunddagi va Turindagi o‘yinlarni umumlashtiradigan jihatlar yetarlicha edi. Birinchidan, bu o‘yinlar turning eng yorqin afishalari edi. Ikkinchidan, ikki uchrashuvda ham birinchi bo‘lim yakunlariga ko‘ra tablodagi nollar saqlanib qoldi. Nihoyat, ikki uchrashuvda ham o‘ta qulay imkoniyatlardan foydalanilmadi. Turindagi birinchi bo‘lim oxirlarida mehmonlar o‘ta qulay vaziyatga ega bo‘lishdi, De Bryuynening pasidan keyin Holand yakkama-yakka vaziyatga chiqib bordi va to‘pni darvozabon ustidan tashlab qo‘yishga urindi, ammo Di Gregorio qo‘lini ko‘tarib, oqshomning eng yaxshi seyvini ijro etishga ulgurdi.
Dortmundda esa «Borussiya» va «Barselona» navbati bilan xavfli vaziyatlarni ko‘kka sovurishdi. Avvaliga Rafinyaning oyog‘iga to‘p yaxshi tushmagani tufayli vaziyat yo‘qqa chiqdi, unga bu safar ham Yamal qanotdan shvedka usulida pas bergandi. Dortmundliklar safida esa Zabitser bir necha metr masofadan gol urolmadi. Ikkinchi bo‘lim boshlanganida Girassi baribir to‘pni darvozaga kiritganida esa «asalarilar»ning hujumdagi uch futbolchisi ham Hansi Flikning ofsayd qopqoniga tushib qolishgandi.
Mavzuga oid
53-daqiqada esa shunga o‘xshash vaziyatda «Barselona» hisobni ochdi. Mehmonlar pressingni yengib o‘tishdi, Olmo o‘zini qo‘riqlayotgan raqibdan qochib ketib, Rafinyani yakkama-yakka vaziyatga chiqarib yubordi. Bensebayni orqaroqda qolib ketgani tufayli ofsayd ro‘y bermadi. Braziliyalik vinger yerlatib yo‘llagan zarbasi bilan uzoq burchakni aniq nishonga oldi – darvozabon Kobel joyidan qimirlay olmadi.
Xuddi shu daqiqada Turinda Ederson mezbonlar himoyachisi Gattining «qaychi» uslubidagi zarbasini qaytardi, ammo mehmon himoyachilar sustkashligi tufayli hujum ikkinchi tempda davom ettirildi va Vlahovich bosh bilan yo‘llagan zarbadan keyin darvozabon to‘pni qo‘lidan chiqarib yubordi va to‘p darvoza chizig‘ini kesib o‘tdi.
Ikki o‘yindagi voqealar shundan keyingina farqli tus oldi. «Barselona» Kubarsining ancha qo‘pol foli tufayli muvaffaqiyatini rivojlantira olmadi. U tushunarsiz holda jarima maydoni ichida Girassini turtib yiqitib, unga penalti va javob golini sovg‘a qildi. Bu vaqtda Di Gregorio «Yuve»ni qutqarishda davom etardi, u Gundo‘g‘anning «to‘qqizlik»ka borayotgan kuchli zarbasini bartaraf etdi. Bunga javoban amalga oshirilgan hujumda turinliklar ikkinchi golni urishdi, bu epizodda amerikaliklar bog‘lami ajoyib harakat qildi. Vea tezkor hujumda to‘pni yumshoq oshirib berdi, Makkenni havodagi to‘pga akrobatik uslubda zarba yo‘lladi - 2:0.
Di Gregorio «Keksa siniora»ga g‘alaba uchun imkon qoldirdi va jamoa bundan foydalandi. Dortmundda esa darvozabonlar ideal emasdi. Kobel o‘ziga kelgan zarbani «Barsa»ni hisobda oldinga olib chiqqan Ferran Torresga tashlab berdi.
Penya esa himoyachilar sun’iy ofsayd yuzaga keltirishda yo‘l qo‘ygan xatosini tuzatishga urinib, jarima maydoni tashqarisiga chiqib keldi, ammo to‘pga ulgurmadi, natijada Girassi bo‘sh darvozani ishg‘ol etib, ikkinchi bor hisobni tenglashtirdi.
Bu golga hammualliflik qilgan Gross esa bir necha daqiqa o‘tib orqaga pas berishda xato qildi va mehmonlar tezkor qarshi hujum uyushtirishdi. Hujum yakunida Yamal ajoyib pas bilan Torres g‘alaba golini urib, dubl rasmiylashtirishiga yordam berdi.
«Barsa» qatorasiga besh uchrashuvda g‘alaba qozonib, pley-off masalasini hal qildi. Bu mavsumda ilk bor yutqazgan «Borussiya»da ham vaziyat yomon emas (12 ochko). Bundan bitta kamroq ochko jamg‘argan «Yuventus»da ham. «Siti»ning holati esa xavotirli. Sakkiz ochko jamg‘argan «shaharliklar» (bu Xosep Gvardiola faoliyatida turnir guruh bosqichidagi olti turda qayd etgan eng yomon ko‘rsatkich) yanvarda «PSJ» bilan o‘ynashiga to‘g‘ri keladi. Kataloniyalik mutaxassis murabbiylik faoliyatida so‘nggi o‘n uchrashuvdagi eng yomon seriyasini qayd etmoqda (+1=2-7).
«Arsenal» va «Monako» Chempionlar ligasining oltinchi turiga 10 tadan ochko jamg‘arib, turnir jadvalida yonma-yon holatda yetib kelgandi. Ammo maydonda jamoalar boshqa-boshqa darajada ekani yaqqol ko‘rinib qoldi.
«Kanonirlar» tezda tashabbusni qo‘lga oldi va vaziyat ketidan vaziyat yaratishga kirishdi. 25-daqiqada Gabriel Jyezus Yakub Kivyorning ortdan uzatmasidan keyin yakkama-yakka vaziyatga chiqib bordi. Ammo bu mavsumda o‘yin amaliyotiga ega bo‘lmayotgan braziliyalik raqib darvozaboni Mayetski bilan duelni boy berdi. Uch daqiqa o‘tib Gabi yana bir qulay imkoniyatni ko‘kka sovurdi — yana jarima maydoniga yorib kirib zarba berdi va bu safar ham darvozabonni alday olmadi.
Monegaskliklar umuman to‘pni raqib tomonda ushlay olmadi va qarshi hujumlar ham uyushtirmadi. 34-daqiqada esa «Arsenal» baribir hisobni ochdi — Bukayo Saka Jyezusning qanotdan uzatmasini yaqin masofadan darvozaga kiritib, karerasidagi eng oddiy gollardan birini urdi. Bu hujumda 18 yoshli yarimhimoyachi Maylz Lyuis-Skelli asosiy ishni bajardi: Martin Edegorning noqulay uzatmasidan keyin to‘pni o‘ziga bo‘ysundirib, Magnes Akliushni aldab o‘tdi va to‘pni Jyezusga yetkazib berdi.
Keyin esa mehmonlar maydon markazida qo‘pol xatoga yo‘l qo‘yib, Edegor yakkama-yakka vaziyatga ega bo‘lishiga qo‘yib berishdi, ammo norvegiyalikning zarbasidan keyin to‘p ustun yonidan o‘tib ketdi. Yana bir qulay vaziyatdan Martinelli foydalana olmadi. Umuman, «Arsenal» birinchi bo‘limdayoq yirik hisob qayd etishi mumkin edi, ammo bu ish ikkinchi bo‘limga qoldi.
Ikkinchi bo‘limda mehmonlar tashabbusni qo‘lga oldi va qator vaziyatlarga ega bo‘ldi, ayniqsa Salibaning pasidan keyin to‘pni egallab olgan Minamino to‘pni Embologa yetkazib berganida hisob tenglashishi ham mumkin edi. Mikel Arteta darhol o‘yinchi almashtirishlar orqali vaziyatni o‘ngladi — Leandro Trossar va Kay Havers «kanonirlar» o‘yinini kuchaytirishdi.
78-daqiqada Havers Salisuning darvozabonga uzatgan pasini egallab oldi va Saka yana bir oddiy gol urishiga yordam berdi. Hisob 0:2 ko‘rinishiga kelgach, «Monako» o‘yinni tashlab yubordi va bir necha daqiqa o‘tib Bukayo Kayga assistentlik qildi.
«Arsenal» bu g‘alaba evaziga uchinchi o‘ringa ko‘tarildi — yanvarda Arteta shogirdlari «Dinamo» Zagreb va «Jirona» kabi autsayderlarga qarshi o‘ynaydi. Londonliklar amalda katta sakkizlikdagi o‘rnini saqlab qoladi. «Monako» esa 16-o‘ringa tushib ketdi, ammo hisobidagi 10 ochko top-24 da qolishi uchun yetarli bo‘lishi mumkin. Monegaskliklarni oldinda «Aston Villa» va «Inter» bilan o‘yinlar kutmoqda.
O‘yin kuni natijasini oldindan aytish mumkin bo‘lgan o‘yin bilan boshlandi, ilojsiz holatdagi autsayder «Atletiko»ga mehmonga kelgani. Madridliklar nafaqat pley-off yo‘llanmasini hal qildi, balki o‘z tarixida ikkinchi bor qatorasiga o‘n uchrashuvni g‘alaba bilan yakunladi. «Slovan» 25 daqiqa chidab berdi — Alvares jarima maydoniga kiriboq olis «to‘qqizlik»ni aniq nishonga olgunicha. Mehmonlar uchun yana bir yoqimsiz holat Barsegyan jarohat olishi bo‘ldi. Armanistonlik yarimhimoyachi har bir o‘yinda faolligi bilan ajralib turgandi va Madriddagi o‘yinda ham xavfli zarba yo‘llab, to‘sinni poylashga ulgurgandi. Birinchi bo‘lim oxirida esa Grizmann darvozabondan balandroq sakrab, hisobdagi farqni oshirdi va o‘yin masalasini amalda hal qildi.
Ammo ikkinchi bo‘lim boshida kutilmaganda Vladimir Vayss jamoasi intrigani qaytardi. «Slovan» VAR tufayli penalti tepish huquqini qo‘lga kiritdi. Lekin qatorasiga besh o‘yinda gol urib kelayotgan Grizmann tezda status-kvoni tikladi. Antuan YeChLda 50 gol urgan to‘rtinchi fransuzga aylanishi uchun yana uchta aniq zarba qoldi. Bir kun oldin Mbappe bu natijaga erishib, Anri bilan tenglashib olgandi, birinchi o‘rindagi Benzema esa kosmik farq bilan oldinga chiqib ketgan (90).
Madriddagi o‘yin unikal voqea bilan YeChL tarixida qoldi. Turnir tarixida ilk bor ikki raqib zaxira o‘rindig‘ida ham ota murabbiylar — katta Vayss va Diyego Simeone o‘tirishdi, maydonda esa ularning o‘g‘illari — kichik Vladimir Vayss va Juliano Simeone harakat qildi. E’tiborli tomoni, slovakiyalik yarimhimoyachi «Manchester Siti»dan uchralgan mag‘lubiyatdan (0:4) keyin faoliyatini tugatganini aytgandi. U 1 oktyabrdan buyon biror marta ham «Slovan»ning o‘yinlari zayavkasiga kiritilmadi, bu safar esa oxirgi daqiqalarda maydonga tushirildi.
Turnirda qatorasiga uch g‘alabaga erishgan «Milan» bu safar kadrlar bo‘yicha muammoga duch keldi. Rossonerilar yanvargacha Pulishich xizmatlaridan foydalana olmaydi, «Tsrvena Zvezda»ga qarshi o‘yinning birinchi bo‘limida esa Loftus-Chik va Morata jarohat olib maydonni tark etdi. Jamoa bo‘limni mag‘lub holda yakunlashi ham mumkin edi, ammo Maksimovichning zarbasidan keyin to‘p to‘singa bordi. Keyin esa saviya o‘z so‘zini aytdi. Fofana uzoqdan Rafael Leauga ajoyib pas uzatdi. Portugaliyalik hujumchi havodagi to‘pni bir harakatda o‘ziga bo‘ysundirdi, ikkinchi harakatda esa uni to‘sin ostidan darvoza to‘riga joyladi. Ikkinchi bo‘limda esa «Milan» ham Radonichdan shu kabi chiroyli gol o‘tkazib yubordi va muxlislarini asabiylashishga majbur qildi. Faqat so‘nggi daqiqalarda Abraham to‘sindan qaytgan to‘pni baribir darvozaga kiritib, g‘alabani ta’minladi.
«Benfika» «Bolonya» mudofaasini yorib o‘tolmadi, Pavlidisning tezkor goli esa ofsayd tufayli bekor qilindi. Birinchi bo‘lim oxirida Di Mariyaga chiroyli gol urishga imkon bermagan Skorupski lissabonliklarga o‘yin davomida muammo tug‘dirdi. Polshalik posbonning yana bir chiroyli nomeri o‘zining xatosini tuzatishi orqali namoyish etildi. Skorupski to‘pni Pavlidisning oyog‘iga tashlab bergandi, ammo darhol masofani yaqinlashtirib, zarbani to‘sishga erishdi. Keyinroq Di Mariyaning yana bir hujumini to‘xtatdi.
«Feyyenoord» pley-offga chiqish uchun muhim g‘alabaga erishib, ochkolari sonini 10 taga yetkazdi. Rotterdamliklar uchun barchasi yanvar oyida «Bavariya» va «Lill»ga qarshi kechadigan o‘yinlarda hal bo‘ladi, «Sparta» o‘yin debyutidayoq taslim etildi. Barchasi Traunerning burchak zarbasidan keyingi goli bilan boshlandi, niderlandlar birinchi bo‘limda uchta gol urishdi, asosiy yevrokubokda bunaqasi jamoa tarixida 1974 yildan buyon kuzatilmagandi. Bunday startdan keyin ustunlikni saqlab qolish ortiqcha qiyinchilik tug‘dirmadi. «Feyyenoord» bu g‘alabadan keyin pley-off zonasiga ko‘tarilib, 24-o‘rinda turgan «PSJ»ni 25-o‘ringa tushirib yubordi, parijliklar yanvarda «Manchester Siti» va «Shtutgart»ga qarshi hayot-mamot o‘yinlarida maydonga tushadi.
Umumiy jadvalda «PSJ» ortidan joylashgan «Shtutgart» o‘tgan mavsumdagi kabi kuchli o‘yin ko‘rsata olmayapti. Oldingi turda nemislar «Tsrvena Zvezda»ga sharmandali hisobda yutqazgandi (5:1), endi esa Sabastiyan Hyoness jamoasi autsayderdan debyutdayoq gol o‘tkazib yubordi. Darvozabon Nyubel yaqin burchakka yo‘llangan zarbaga tashlanishga ham ulgurmadi. Ammo bu safar jamoa vaziyatni o‘nglay oldi. Bo‘lim o‘rtalarida Shtiller muvozanatni tikladi, ikkinchi bo‘limda mezbonlar bir necha daqiqa ichidagi ikki gol bilan mehmonlarni sindirishdi. Shveytsariyaliklar shundan keyin sochilib ketdi, «Shtutgart» g‘alabasining asosiy arxitektori esa uch marta sheriklariga assistentlik qilgan Rider bo‘ldi. 1:5 ortidan 5:1 hisobida g‘alaba qozongan nemislar keyingi turda yana bir autsayder jamoa «Slovan»ga qarshi o‘ynaydi va bu uchrashuvda g‘alaba qozonib, pley-offga o‘tish o‘yinlariga ilinishi mumkin.
Avstriya chempionlari o‘tgan turda nihoyat birinchi g‘alabaga erishgandi. Lillda esa mehmonlar birinchi bo‘limdayoq ikki gol o‘tkazishdi. Bo‘lim oxirida hisob qisqardi, ikkinchi bo‘lim boshida tenglashtirildi. Ammo o‘yin oxirida Gratsdan kelgan jamoa baribir mudofaada xatoga yo‘l qo‘ydi va maydonga endigina tushgan Haraldsson to‘pni yaqin burchakka mixladi. 15 o‘yindan buyon yutqazmayotgan Bryuno Jyenezio shogirdlari bu g‘alabadan keyin 13 ochko bilan eng yaxshi sakkizlikka kirib oldi, «Shturm»ning pley-offga chiqish imkoniyati esa nolga yaqinlashdi. Yanvarda, Avstriyada chempionatda tanaffus yuzaga kelganida, qora-oqlar «Atalanta» va «Leypsig» bilan o‘ynaydi.
Kun statistikasi
Fransuz klublari tarixda 1-marta Chempionlar ligasida Angliyadan bo‘lgan raqiblarga ketma-ket to‘qqizinchi o‘yinni boy berdi.
Kenan Yildiz «Yuventus» safida Pogba va Mirettilan keyin YeChLda 20 yoshga qadar 6 o‘yin o‘tkazishga ulgurgan 3-futbolchi bo‘ldi.
17 yoshu 2 oylik — «Lill» yarimhimoyachisi Buaddi fransuz klublari safida asosiy yevrokubokda 5 o‘yin o‘tkazgan eng yosh futbolchi.
Grizmann Diyego Simeone boshqaruvidagi «Atletiko»da YeChLda 36 gol urdi. Argentinalik murabbiy va fransuz to‘purar faqat ikki juftlikdan ortda: Xosep Gvardiola va Messi (43 gol) hamda Yurgen Klopp va Saloh (41).
