Hokimlar va futbol. Yil boshidagi maqsad va xarajatga yarasha qanday natijaga erishildi?

Ushbu mavsum oldidan ham aksariyat viloyat hokimlari jamoalar oldiga chempionlik vazifasini qo‘ygan edi. Jumladan, Farg‘ona viloyati hokimi Xayrullo Bozorov «Neftchi», Namangan viloyati hokimi Shavkat Abdurazzoqov «Navbahor», Qashqadaryo viloyati hokimi Murodjon Azimov «Nasaf» oldiga chempionlik vazifasini qo‘ygan edi. Yakunda voha klubi vodiy jamoalarini ortda qoldirib, jamoa uchun qilingan katta xarajatlarni oqladi, deyish mumkin.

Tribuna.uz sayti yil boshida aksariyat klublar oldiga qanday maqsad qo‘yilgani, klublarning yillik taxminiy xarajati va yakunda qanday natijaga erishganiga nazar tashladi.

2024 yilgi mavsum oldidan:

Hokim Qashqadaryo xalqi chempionlikni kutayotganini aytdi, Ro‘ziqul Berdiyev va’da berdi

«Nasaf» jamoasining 2024 yilgi mavsum oldi tanishtiruv marosimida viloyat hokimi Murodjon Azimov, klub bosh homiysi sanalmish «Sho‘rtan gaz-kimyo majmuasi» rahbariyati ishtirok etib, 2024 yilda Qashqadaryo ahli jamoadan faqat va faqat chempionlik kutayotganini ma’lum qildi.

«Qashqadaryo xalqi anchadan buyon sevimli jamoamizning O‘zbekiston chempionligini qo‘lga kiritishni orzu qilmoqda. Joriy yilda ushbu orzuni ushalishiga bor kuchimiz bilan harakat qilishimiz kerak. Jamoamiz oldidagi maqsad va vazifalarni bajarish uchun viloyat rahbariyati har qanday yordamni ayamaydi», - deya ta’kidlagan Azimov.

Jamoa nomidan so‘zga chiqqan bosh murabbiy Ro‘ziqul Berdiyev yil davomida «Nasaf»ni qo‘llab-quvvatlagan barchaga o‘z minnatdorchiligini bildirib, yangi mavsumda jamoa oldiga qo‘yilayotgan maqsad yo‘lida birlashib, viloyat ahli uzoq kutgan chempionlik uchun kurashishga va’da bergan.

2024 yilgi mavsum yakuni: «Nasaf» ilk bor Superliga chempioni

Bosh murabbiy Ro‘ziqul Berdiyev mavsumda jamoasi oldiga qo‘yilgan vazifani muddatdan avval bajarib, ilk bor chempionlikni boshi uzra ko‘tardi. Tribuna.uz saytiga ma’lum bo‘lishicha, «Nasaf»ning yil boshida Superligadan tashqari, OChLda ham ishtirok etishi inobatga olinib, yillik budjeti taxminan 130 milliard so‘m atrofida belgilangan. O‘zbekistonda yillik eng katta smeta va buning evaziga barqaror tarkib qilingani ham yakunda «Nasaf»ning muvaffaqiyatli odimini ta’minladi.

E’tiborlisi, 2025 yildan Qashqadaryo viloyatining o‘zidan Superligada 3ta jamoa  - «Nasaf» (Qarshi), «Mash’al» (Muborak) va «Sho‘rtan» (G‘uzor) ishtirok etadi.

2024 yilgi mavsum oldidan:

«Chempion bo‘lish vaqti keldi» – Namangan viloyati hokimi yangi mavsum shiorini belgiladi

«Navbahor» klubining so‘nggi yillardagi muvaffaqiyatida Namangan viloyati hokimi va jamoaning birinchi raqamli ishqibozi Shavkat Abdurazzoqovning hissa katta bo‘ldi. Viloyat rahbari so‘nggi 3 yildan buyon jamoa oldiga chempionlik maqsadini qo‘yib kelayotgan bo‘lsa-da, Samvel Babayan murabbiyligidagi jamoa chempionlik sovrinini Namanganga olib kela olmadi. 

Taqdimot marosimida Namangan viloyat hokimi klub Osiyo Chempionlar Ligasida tarixiy natija qayd etganini ta’kidlab, «Chempion bo‘lish vaqti keldi», deya yangi mavsum shiorini belgiladi. Chempionlikni Toshkentdan Namanganga olib kelish uchun esa Odil Hamrobekov, Farrux Sayfiyev, Siyovush Haqnazariy, Ruslan Jiyanov, Giorgi Nikabadze singari nomdor o‘yinchilar taklif etilganini ma’lum qilgandi.

2024 yilgi mavsum yakuni: «Navbahor» yana chempion bo‘lolmadi 

Namangan klubi tarkibga jalb etilgan katta maoshli futbolchilarga qaramay Superligada chempionlik kurashidan chiqqani ma’lum bo‘lgach, viloyat hokimi Samvel Babayanni iste’foga chiqardi. Klub esa Sergey Lushan qo‘l ostida chempionatni bir amallab 3-o‘rinda yakunladi va bronza medaliga ega chiqdi.

«Navbahor» so‘nggi yillar davomida taxminan 70-80 milliard so‘m yillik budjeti bilan chempionlikka erisha olmagach, Namangan viloyati hokimi katta budjet sovringa ega chiqishni kafolatlay olmasligini tushundi shekilli, 2024 yil yakunida jamoaning katta maoshi o‘yinchilari Jamshid Iskanderov, Odil Hamrobekov, Farrux Sayfiyev, Toma Tabatadze, Filip Ivanovich, Yovan Jokich, Siyovush Haqnazariy singari o‘yinchilar bilan xayrlashib, tarkibga namanganlik mahalliy o‘yinchilarni jalb etishga qaror qildi.

2024 yilgi mavsum oldidan:

Xayrullo Bozorov: «Neftchi»ning bu yilgi maqsadi bitta – chempionlik!»

Farg‘ona viloyati hokimi Xayrullo Bozorov so‘nggi 4 yildan buyon «Neftchi» klubiga katta e’tibor qaratmoqda. Bozorov yil boshidagi tanishtiruv marosimida 2024 yilda jamoa oldiga ilk marta chempionlik vazifasi qo‘yilgani va buning uchun barcha sharoitlar yaratilganini ma’lum qildi.

«Bu yilgi maqsad bitta, bu ham bo‘lsa faqat – chempionlik! Bosh murabbiyi Vitaliy Levchenko va jamoamizga ishonaman. Mavsumga yuqori darajada tayyorgarlik ko‘rildi, tarkib kuchaytirildi. Mavsum yakunida sizlar bilan jamoamizni quchoq ochib, chempionlik bilan tabriklash nasib qilsin», - dedi Xayrullo Bozorov futbolchilarning taqdimot marosimida.

2024 yilgi mavsum yakuni: «Neftchi» 5-o‘rinda 

Vitaliy Levchenko murabbiyligidagi Farg‘ona jamoasiga yil boshida chempionlik vazifasi qo‘yilgan bo‘lsa-da, «Neftchi» mavsum davomida barqaror bo‘la olmadi. Orada jamoadagi moliyaviy holat yaxshi emasligi, maoshlarni to‘lashda uzilishlar bo‘layotgani haqida xabarlar yangradi. Oxir-oqibat jamoa mavsumni 5-o‘rinda yakunladi. Tribuna.uz manbasiga ko‘ra, yil boshida «Neftchi» oldiga chempionlik vazifasi qo‘yilgach, klubning 2024 yildagi xarajatlari smetasi 100 milliard so‘mni tashkil qilgan. 

Katta xarajatga qaramay, chempionlikka erishilmagan bo‘lsa-da, viloyat hokimi Xayrullo Bozorovning tashabbusi bilan «Neftchi» 2025 yilda ham chempionlikni maqsad qilgan va allaqachon tarkibga nomdor o‘yinchilarni jalb qildi. Taklif etilgan yangi legionerlardan biri Vladimir Yovovichning yillik maoshi 300 ming AQSh dollarini tashkil etishi aytilmoqda. Bu Farg‘ona klubining 2025 yilgi jami budjetidan qariyb 4 milliard so‘m aynan chernogoriyalik ushbu legionerning maoshi uchun sarflanishini anglatadi...

2024 yilgi mavsum oldidan:

Jahongir Ortiqxo‘jayev «Paxtakor» oldiga ilk bor chempionlik vazifasini qo‘ymadi

«Paxtakor» klubining prezidenti sanalmish sobiq Toshkent shahar hokimi Jahongir Ortiqxo‘jayev «Paxtakor» o‘yinchilari bilan mavsum oldi uchrashuvda klub yangilanayotganini ma’lum qilgan va bu tarkib oldiga chempionlik vazifasini qo‘ymadi.

«Paxtakor» yangilandi. Sizlarni ko‘rib ko‘zim quvnayapti. 5-6 nafaringizni inobatga olmasa, barchangiz yoshsiz. Bunday imkoniyat har doim ham bo‘lmaydi. Futbolchining sportdagi hayoti qisqa. 2 yil qattiq mehnat qiling, pul sizni o‘zi quvsin. Men sizlar bilan hali katta loyihalarga qo‘l uraman. Endi klubning asosiy strategiyasi yoshlarni Yevropaga shu yerning o‘zidan sotish bo‘ladi. Bu esa milliy jamoamiz uchun ham foyda. Hech qachon maydonda o‘zingizni xafa qildirmang», - deya Ortiqxo‘jayevning so‘zlarini keltirgan klub matbuot xizmati.

2024 yilgi mavsum yakuni: «Paxtakor» 6-o‘rinda 

Maksim Shatskix murabbiyligidagi «Paxtakor» oldiga chempionlik vazifasi qo‘yilmagach, asosan yoshlarga tayangan ushbu jamoa turnirni 6-o‘rinda yakunladi. Mavsum yakunida esa Ortiqxo‘jayev Dragan Chergan va yana bir qator tajribali o‘yinchilarni tarkibdan chetlatgani ma’lum bo‘ldi. 

Klub raisi yaqinda jamoaning portugaliyalik yangi bosh murabbiyini tanishtirib, «Paxtakor» 2025 yilda chempionlik uchun kurashishini ma’lum qildi. Shatskix esa uning maslahatchisi sifatida faoliyat yuritishini aytib o‘tdi. Ortiqxo‘jayev «Paxtakor»ning 2024 yildagi yillik xarajatlar smetasi uchun qariyb 100 milliard so‘m sarflagani, 2025 yilda esa klubning yillik budjeti 100 milliard so‘mdan oshishini ma’lum qildi.  

Qolgan klublar qancha xarajat qildi?

Superligada «Paxtakor»dan keyingi 7-o‘rinni «Surxon» jamoasi egalladi. Taniqli tadbirkor Baxtiyor Fozilov va Eriell kompaniyasi tomonidan moliyalashtirilgan ushbu jamoaning yillik xarajat smetasi taxminan 50-60 milliard so‘mni tashkil etgan.

Pro ligadan qaytgan «Dinamo» bu yil chempionatda 8-o‘rinni egalladi. Yil boshida viloyat hokimi Erkinjon Turdimov jamoa oldiga aniq vazifa qo‘ymagan bo‘lsa-da, Vadim Abramov jamoasi o‘z o‘yini bilan muxlis va mutaxassislar e’tiboriga tushdi. Xususiy «Agromir Group» kompaniyasi tomonidan moliyalashtirilgan ushbu klub Superliga-2024da eng kam budjetga ega bo‘lgani haqida jamoa murabbiyi matbuot anjumanida aytib o‘tgan edi. «Dinamo»ning 2024 yilgi yillik budjeti taxminan 40 milliard so‘m bo‘lgan. Samarqand jamoasi yangi hokim Adiz Boboyev rahbarligida qanday ishtirok etishini 2025 yilgi mavsumda ko‘ramiz.

Andijon viloyati hokimi Shuhrat Abdurahmonov va O‘zAvtoSanoat rahbariyati yil boshida «Andijon» oldiga chempionlik vazifasini qo‘ymagan bo‘lsa-da, klub yuqori o‘rinlar uchun kurashishi kerakligi haqida gapirilgandi. Mavsumda Aleksandr Xomyakov shogirdlari sensatsion tarzda O‘zbekiston kubogi-2024 g‘olibiga aylanishdi. Bunga javoban klub rahbariyati va viloyat hokimi tomonidan jamoa o‘yinchilariga g‘oliblik uchun 200 million so‘mdan mukofot pullari berilgan. Umuman olganda esa klubning yillik xarajatlar smetasi taxminan 45 milliard so‘mni tashkil etgan. Klub mavsumni 9-o‘rinda tugatdi.

Superliga joriy mavsumida ligada qolish uchun kurashgan va yakunda turnirni 10-o‘rinda yakunlagan «Bunyodkor» klubining yillik xarajatlar smetasi taxminan 100 milliard so‘m atrofida bo‘lgan. Klub «O‘zbekneftgaz» tomonidan moliyalashtirilgan. 

Superligada 11-o‘rinni olgan «Qizilqum» klubi odatdagidek Navoiydagi yirik sanoat tashkiloti NKMK tomonidan moliyalashtirildi. Tribuna.uz ma’lumotlariga ko‘ra, Jamshid Saidov murabbiyligidagi «Qizilqum» klubining yillik budjeti taxminan 50 milliard so‘m atrofida bo‘lgan.

Superliga 2024 yilgi mavsumi yakunida elitadagi o‘rnini saqlab qolish uchun kurashgan va ayni damda ligada qolish-qolmasligi noma’lum bo‘lib turgan 3 jamoa - «Metallurg», «Olimpik» va «Lokomotiv» orasidan Pro ligaga ravona bo‘lgan Toshkent jamoasining yillik smetasi taxminan 65 milliard so‘m atrofida bo‘lgan, «Metallurg»ning yillik budjeti esa 50 mlrd so‘m atrofida qilingan. «Olimpik»ning yillik xarajatlari smetasi haqida esa ma’lumot topishning imkoni bo‘lmadi.