Holand penaltidan ham gol urolmadi, «Chelsi» kambek qurboni. APLda Boxing day

Daych va Pikford devori

«Manchester Siti» – «Everton» 1:1
Gollar: 1:0 – 14 Bernardu Silva, 1:1 – 36 Ndiay.
«Manchester Siti» – Ortega, Gvardiol, Ake (Simpson-Pyuzi, 85), Akanji, Lyuis, Kovachich (Gundo‘g‘an, 85), Doku (de Bryuyne, 75), Bernardu Silva, Foden, Savio, Holand.
«Everton» – Pikford, Mikolenko, Brentueyt, Tarkovski, Koulmen (Patterson, 90), Dukure, Guyye, Mangalya, Ndiay (Lindstrem, 81), Kalvert-Lyuin (Broya, 70), Harrison.
Ogohlantirishlar: Mikolenko (42), Koulmen (52), Mangalya (79), Brentueyt (87), Foden (90+4).

Inqiroz davridagi «Manchester Siti»ni oldingi turlarda «Arsenal» va «Chelsi»dan gol o‘tkazmagan Shon Daych nomidagi metin himoyaga qarshi qiyin o‘yin kutayotgandi. Ammo Boxing Day’da Xosep Gvardiola jamoasi Londonning ikki klubi qila olmagan ishni uddaladi. Mezbonlar tezkor gol bilan hisobni ochishdi, Pikford Bernardu Silvaning zarbasini qaytarishi mumkin edi, ammo to‘p «Everton» himoyachisining oyog‘iga tekkan holda yo‘nalishini o‘zgartirib, olis burchakka borib tushdi.

Bunday ssenariy esa yangi intrigani taqdim etardi: «irislar» qanday gol urishi mumkin? Bu jamoada mudofaa chizig‘i yaxshi qurilgan, so‘nggi olti turda faqat to‘rt gol o‘tkazib, faqat to‘rt gol urgan. Bu gollarning barchasi «MYu» bilan o‘yinda o‘tkazilgan (0:4), to‘rt gol «Vulverhempton» bilan o‘yinda urilgan (4:0), qolgan to‘rt o‘yinda hisob ochilmagan. Ammo «Siti»ga qarshi tezda javob qaytarildi, Ndiayye Akanjining xatosidan foydalanib, to‘pni uzoq burchakka yo‘naltirdi. Keyeyin esa Pikford barcha zarbalarni, jumladan Holandning penaltisini ham qaytardi. Jordan APLda ushbu norvegiyalik hujumchining «nuqta»dan zarbasini to‘sgan ilk darvozabon bo‘ldi va chempionatda sakkizinchi «quruq» o‘yinini o‘tkaza olmagan bo‘lsa ham yana qahramonga aylandi. Gvardiola uchun esa hech qanday bayram yo‘q: uning jamoasi hisobda oldinda borgan o‘yinlarda 12 ochko yo‘qotdi, bu o‘tgan mavsumdagidan yomonroq (10).

45 yillik kutish

«Chelsi» – «Fulhem» 1:2
Gollar: 1:0 – 16 Palmer, 1:1 – 82 Uilson, 1:2 – 90+5 Rodrigo Muniz.
«Chelsi» – Sanches, Kukurelya, Koluill, Adarabioyo, Gyusto, Kaysedo, Fernandes, Palmer, Sancho, Netu, Jyekson (Nkunku, 73).
«Fulhem» – Leno, Bassi, Andersen, Diop, Kastan, Robinson, Lukich, Pereyra (Kerni, 73), Ivobi, Traore (Uilson, 67), Himenes (Rodrigo Muniz, 74).
Ogohlantirishlar: Lukich (34), Andersen (38), Netu (59), Robinson (90+1).

Palmer bo‘lmasa, kim?! «Chelsi» maydonda ekanida bu savol ritorik bo‘lib yangraydi. Bu safar ham yosh yarimhimoyachi to‘pni qabul qilib oldi, bir necha himoyachini ortda qoldirib, raqib jarima maydoni tomon yurdi va ustun yoniga zarba yo‘llab, to‘pni darvoza to‘riga kirgizdi. Keyinroq Kukurelyaning yaqin masofaga yo‘llagan zarbasini to‘sgan Leno u qadar qiyin bo‘lmagan vaziyatda qutqara olmadi. Palmer esa APLdagi 50 o‘yinida bundan ko‘proq golli harakatlar amalga oshirgan - 34 gol va 18 golli uzatma, bu esa turnir tarixidagi uchinchi eng yaxshi ko‘rsatkich. Undan oldinda faqat Holand (64 ball) va Endi Koul (57) bor. Qolaversa, u kalendar yilidagi gollar soni bo‘yicha «Chelsi» rekordini o‘rnatdi, futbolchi 2024 yil boshidan beri London klubi uchun 26 ta gol urgan va 2001 yilda Jimmi Floyd Hasselbaynk tomonidan o‘rnatilgan rekordni (25 gol) yangiladi. 

Lekin ko‘klar safida shu kuni boshqa hech kim gol urmadi. Ikkinchi bo‘lim Enso Fernandesning goli bilan boshlanishi mumkin edi, ammo Leno to‘sin ostiga kirib borayotgan to‘pni to‘sishga ulgurdi. Keyin esa mehmonlar to‘liq tashabbusni qo‘lga olishdi. Bir safar Sanches Robinson yaqin masofadan gol urishiga imkon bermadi. Keyin yana bir bor qutqardi, ammo u zaxiradan tushgan Uilsonning zarbasi qarshisida ojiz qoldi, unga Kastanya assistentlik qildi. Lekin bu hujumda asosiy ishni Ivobi bajardi, u qanotdagi yurishi vaqtida Pedru Netuni bolalarcha aldab o‘tdi, portugaliyalik yarimhimoyachi esa o‘ziga qo‘pollik ishlatilganiga ishontirmoqchi bo‘lib kulgiga qoldi.

Qo‘shimcha daqiqalar esa — Lenoning benefisiga aylandi, u hisob 1:1 va 1:2 ekanida «Fulhem»ni yana ikki bor qutqardi. Zaxiradan tushgan yana bir futbolchi Rodrigo Muniz esa g‘alaba golini urdi. Braziliyalik hujumchi Angliya chempionatida 45 yildan buyon «Stemford Brij»dagi g‘alabani ko‘rmagan jamoa muxlislari uchun haqiqiy bayram uyushtirib berdi. Bu g‘alaba Marku Silva jamoasiga to‘plangan ochkolar soni bo‘yicha «Manchester Siti»ga tenglashib olish imkonini berdi, «Chelsi» esa juma kungi o‘yinlar natijasiga ko‘ra ikkinchi o‘rinni «Arsenal»ga bo‘shatib berishi mumkin.

«Nottinghem» uchinchi, «Nyukasl» — beshinchi

«Nyukasl» – «Aston Villa» 3:0
Gollar: 1:0 – 2 Gordon, 2:0 – 59 Isak, 3:0 – 90+1 Joelinton.
«Nyukasl» – Dubravka, Xoll, Bern, Sher, Tripper (Targett, 79), Joelinton, Tonali, Bruno Gimaraes, Gordon (Uillok, 79), Merfi (Barns, 79), Isak.
«Aston Villa» – Martines, Din, Pau Torres, Konsa, Kesh (Nedelkovich, 69), Onana, Kamara (Barkli, 69), Rojyers (Beyli, 69), Tilemans (Uotkins, 46), Makginn (Buendia, 80), Duran.
Ogohlantirishlar: Kesh (14), Trippiyer (23), Joelinton (45).
Chetlatish: Duran (32).

«Aston Villa» uchun payshanba kungi o‘yin ilk daqiqalardanoq noxushlik bilan boshlandi, 2-daqiqada hisobni ochgan Gordon faoliyatida ilk bor qatorasiga uch o‘yinda golli harakat sodir etdi. O‘z navbatida, so‘nggi vaqtlarda markaziy hujumchi o‘rni uchun raqobatda ustun kelayotgan va Uotkinsdan ko‘proq o‘ynayotgan Duran birminghemliklarni qiyin ahvolga solib qo‘ydi. Kolumbiyalik hujumchi Sher bilan to‘qnashuvdan keyin inersiya bo‘yicha harakatlanishda davom etdi va o‘z butsasining ostki qismi bilan raqibining yelkasini bosib o‘tdi.

Hakam buni qizil kartochka deb topdi, ozchilik bo‘lib qolgan jamoa birinchi bo‘limdayoq taslim bo‘lishi mumkin edi, ammo Emiliano Martines Tonalining zarbasidan keyin navbatdagi marta ajoyib seyv amalga oshirdi.

Faqat ushbu argentinalik ham sehrgar emas, u ikkinchi bo‘limda Bruno Gimaraes himoyachilar ortga ajoyib pas uzatgan, Merfi esa to‘pni Isakning oyoqlari ostiga tashlab bergan vaziyatda hech narsa qila olmadi. Bu tandem biroz o‘tib yana bir golni yuzaga keltirdi, ammo shvetsiyalik hujumchi ofsaydda qolgandi. Gimaraesning ham goli bekor qilindi (to‘p qo‘l bilan o‘ynalgani uchun), ammo arbitr tomonidan o‘yinga qo‘shib berilgan daqiqalarda Joelinton hisobni yirik ko‘rinishga keltirdi. «Nyukasl» asosiy raqibga qarshi amalda olti ochko uchun kechgan bahsda ustun keldi va beshinchi o‘ringa chiqib oldi.

«Nottinghem Forest» – «Tottenhem» 1:0
Gol: 1:0 – 28 Elanga.
«Nottinghem Forest» – Zels, Uilyams, Murillo, Milenkovich, Ayna, Anderson (Uord-Prouz, 82), Yyeyts, Hadson-Odoi (Sosa, 87), Gibbs-Uayt (Silva, 82), Elanga (Morato, 74), Vud (Avoniyi, 87).
«Tottenhem» – Forster, Udodji (Porro, 81), Grey, Dregushin (Bissuma, 87), Spens, Sarr (Meddison, 64), Bentankur (Bergvall, 64), Son Hyon Min (Verner, 81), Kulusevski, Jonson, Solanke.
Ogohlantirishlar: Yyeyts (10), Anderson (45), Dregushin (49), Murillo (65), Spens (75), Meddison (77).
Chetlatish: Spens (90+4).

Nunu Eshpirinu Santu effekti: hozirdanoq «Nottinghem» APLga qaytilganidan keyingi ikki mavsumdagi g‘alabalardan (9 tadan) ko‘proq g‘alabaga ega (10). Jamoada 1995 yildan buyon ushbu turnirda qatorasiga to‘rt o‘yinda g‘alaba kuzatilmagandi. Buning evaziga jamoa uchinchi o‘ringa chiqib oldi, «o‘rmonchilar» bu o‘rinni kamida «Arsenal»ning juma kungi o‘yini yakuniga qadar saqlab qoladi. O‘z navatida, Elanganing goli tufayli mag‘lub bo‘lgan «Tottenhem» uzil-kesil turnir jadvalining ikkinchi qismida o‘rnashib qoldi, o‘yinni qutqarish mumkin bo‘lgan daqiqalarda esa Spens ikkinchi bor sariq kartochka olib, jamoaning imkoniyatini keskin kamaytirib yubordi. «Shporlar» anchadan buyon muxlislarini Boxing Day’da yutqazmaslikka o‘rgatib qo‘ygandi. Bu mag‘lubiyat — 2003 yildan buyon birinchisi. Va buni tasodif deb bo‘lmaydi, chunki Angelos Postekoglu jamoasi joriy mavsumda allaqachon to‘qqiz marta yutqazib bo‘ldi. Bundan ko‘proq mag‘lubiyat «Vulverhempton» (11) va «Sauthempton» (14) kabi autsayderlarda kuzatilgan.

Ten Hagdan yomonroqmi?

«Vulverhempton» — «Manchester Yunayted» 2:0
Gollar: Kunya (58), Hvan (90+9). 
«Vulverhempton» – Sa, Joao Gomes, Bueno, Doerti, Kunya, Gedesh (Hvang Hi Chan, 74), Ait-Nuri (Rikardu Gomesh, 87), Gomes (Doyl, 73), Andre, Semedu (Bellgard, 90+2), Larsen (Douson, 90+2).
«Manchester Yunayted» – Onana, Martines, Maguayr, Yoro (Antoni, 63), Fernandesh, Diallo (Garnacho, 79), Dalot, Maynu (Kazemiro, 63), Ugarte (Eriksen, 63), Mazraui, Hoylund (Zirkze, 79).
Ogohlantirishlar: Yoro (4), Fernandesh (18), Gomes (33), Ugarte (54), Doerti (90).
Chetlatish: Fernandesh (47).

Vulverhemptondagi o‘yin — portugaliyalik mutaxassislar dueli bo‘ldi. Ruben Amorim vatanida «Sporting» bilan ikki bor chempionlikni qo‘lga kiritgan. «Bo‘rilar»ni qutqarish uchun chaqirilgan Vitor Pereyra o‘tgan o‘n yillik boshlarida «Portu» bilan ikki bor chempion bo‘lgan, keyin Gretsiya, Saudiya Arabistoni, Xitoy va Braziliya chempionatlarida ishlagan. U jamoaga tayinlangani haqida 19 dekabr kuni e’lon qilingandi, uch kun o‘tib «Vulverhempton» «Lester»ni yirik hisobda taslim etdi (3:0).

O‘yinning birinchi bo‘limida jamoalar maksimal darajada zich darajada o‘ynadi va yodda qolarli voqealar kam bo‘ldi. Mezbonlar hisobni ochishi mumkin edi, Onana Strand-Larsenning gazonga sapchib kelgan murakkab zarbasini amallab bartaraf etdi. Joze Sa esa Lisandro Martinesning hujumidan keyin to‘pni osonlik bilan egallab oldi. Ikkinchi bo‘lim «MYu» muxlislari uchun shok holat bilan boshlandi — Brunu Fernandesh chempionat boshidan buyon ikkinchi bor maydondan chetlatildi, u raqibning oyog‘ini bosib oldi va unga ikkinchi sariq kartochka ko‘rsatildi. Portugaliyalik yarimhimoyachi uchun bu joriy mavsumda barcha turnirlar doirasidagi uchinchi chetlatilish — bunaqasi oxirgi bor 2008/09 yillar mavsumida Nemanya Vidich bilan sodir bo‘lgandi.

Ammo bu hali hammasi emasdi. Liga kubogi doirasida «Tottenhem»ga qarshi o‘yinda bo‘lgani kabi «qizil iblislar» burchakdan to‘g‘ridan to‘g‘ri yo‘llangan zarbani o‘tkazib yubordi. Son Xin Minning goli Mateus Kunya ijrosida takrorlandi.

Mehmonlar bunga qarshi javob bera olmadi, qo‘shimcha daqiqalarda esa qarshi hujumdan gol o‘tkazib yubordi, birinich gol muallifi yakkama-yakka vaziyatga chiqib borib, to‘pni jamoadoshi Hvang Hi Chhangdan qizg‘onmadi. «Bo‘rilar» xavfli zonani tark etishdi, «MYu» esa derbidagi shov-shuvli g‘alabadan keyingi uch o‘yinda yutqazdi va hamon o‘n to‘rtinchi o‘rinda qolmoqda. Qolaversa, Amorim APLning yetti turida 4 bor yutqazdi, Erik ten Hagda ham startdagi to‘qqiz o‘yinda shuncha mag‘lubiyat bo‘lgandi.

Salohni to‘xtatib bo‘lmayapti

«Liverpul» — «Lester» 3:1
Gollar: Gakpo (45+1), Jons (49), Saloh (82) — Ayyu (6). 
«Liverpul» – Alisson, Roberson (Tsimikas, 86), van Deyk, Gomes, Aleksander-Arnold, Mak Allister (Elliot, 90+2), Gravenberh (Endo, 87), Gakpo, Jons (Soboslai, 77), Salax, Nunes (Diogu Jota, 78).
«Lester» – Stolyarchik, Kristiansen, Vestergor, Koudi (Okoli, 90+5), Jastin, Sumare, Uinks (Skipp, 65), Mavididi (Dekordova-Rid, 87), Al Hannus (Buonanotte, 64), Ayyu, Daka.
Ogohlantirishlar: Gomes (37), Ayyu (43), Vestergor (58), Roberson (58), Soboslai (80).

Kun davomidagi o‘yinlar natijalari «Liverpul» uchun ideal ko‘rinish oldi, ammo o‘yin kunini yakunlab bergan qizillar ham qiyinchilikka uchrashdi. Ayyu Robersonni dog‘da qoldirib, tezkor gol urdi. Shundan keyin «Lester» tumanga burkangan «Enfild»da klassik avtobus qo‘ydi. Mezbonlar faqat birinchi bo‘limga qo‘shib berilgan daqiqalarda bu himoya devorini yorib o‘tishdi, avvaliga Salohning zarbasidan keyin to‘p to‘singa tegdi, ammo Gakpo ideal zarbasi bilan to‘pni olis burchakka aniq yo‘naltirdi.

«Lester» doimiy bosim ostida to‘liqib qoldi va mersisaydlik futbolchilarga yetolmay qolgandi va tanaffus «tulkilar»ga o‘ziga kelish uchun imkon bo‘lishi mumkin edi. Ikkinchi bo‘lim esa uzoq davom etgan hujum bilan boshlandi va bu hujumga Mak Allisterning uzatmasini golga aylantirgan Jons yakun yasadi. O‘yin oxirida esa Saloh ham o‘z nomini tabloga yozdirib qo‘ydi. Misrlik hujumchi APL uy o‘yinlari doirasidagi yuzinchi golini nishonladi, shundan faqat ikkitasi «Chelsi» safida urilgan. Qolaversa, u chempionatning joriy mavsumida qatorasiga o‘n o‘yinda golli harakat sodir etmoqda (12+7). Bundan tashqari, u amalda faoliyatini davom ettirayotgan futbolchilar orasida Boxing day o‘yinlaridagi eng sermahsul futbolchi (7+4).

Qizillar muxlislari uchun asosiy sovg‘a esa — eng yaqin ta’qibchi «Chelsi»dan 7 ochkoga o‘zib ketilgani bo‘ldi. Bugun «Ipsvich»ga qarshi o‘ynaydigan «Arsenal»da farqni olti ochkogacha qisqartirish imkoniyati bo‘ladi, ammo qizillar zaxirasida «Everton»ga qarshi qoldirilgan o‘yin ham bor.

Kun statistikasi

• «Manchester Siti» so‘nggi o‘n uch o‘yinida faqat 1 marta darvozasi daxlsizligini saqlab qololgan.
• Vitor Pereyra «Vulverhempton» bilan dastlabki ikki o‘yinida g‘alaba qozongan 1-mutaxassis bo‘ldi.
• «Everton» darvozaboni Pikford APLda 7-bor penalti qaytardi.
• 8,24 — «Manchester Siti» hujumchisi Holandning APLda so‘nggi o‘n uch o‘yindagi kutilgan gollar koeffitsiyenti (xG). Norvegiyalik hujumchi buncha imkoniyatdan atigi uchta gol urgan.
• «Chelsi» 25 yil mobaynida chempionatda 82-daqiqaga qadar hisobda oldinda borgan o‘yinlarida yutqazmagandi. 1999 oktyabrida ko‘klar jamoasi «Arsenal» bilan derbida shunday shok holatini boshdan kechirgandi (2:3).
• «Manchester Siti» yil boshidan buyon 62 gol o‘tkazib yubordi. Bu «shaharliklar» uchun so‘nggi to‘qqiz yildagi eng yomon ko‘rsatkich.
• «Liverpul» hujumchisi Saloh APL uy o‘yinlarida 100 gol urishi uchun 142 o‘yin talab etildi. Bunday ko‘rsatkichga undan tezroq faqat Alan Shirer (91), Tiyerri Anri (113) va Serxio Aguero (125) erishgan.

Turnir jadvalidagi vaziyat: