“Umid avto” rahbari qamoqqa olindi. U juda ko‘p miqdordagi firibgarlikda gumonlanmoqda

“Umid avto companes” MChJ rahbari Abdumannop Abdurahmonov qamoqqa olindi. Bu haqda Kun.uz’ga IIV Tergov departamenti xabar berdi.

Ma’lum qilinishicha, Yangihayot tumani IIO FMB huzuridagi Tergov bo‘limi tomonidan “Umid avto companes” MChJ rahbari va jamiyatning boshqa mansabdor shaxslariga nisbatan Jinoyat kodeksining 168-moddasi 4-qismi “a” bandi (firibgarlik) bilan jinoyat ishi qo‘zg‘atilgan.

“Tergov harakatlari natijasiga ko‘ra, jamiyat mansabdor shaxslari

A.A., M.N. va S.I.ga nisbatan Jinoyat kodeksining 168, 188-1 (pul mablag‘larini va (yoki) boshqa mol-mulkni jalb etishga doir noqonuniy faoliyat) hamda boshqa moddalarning tegishli qismlari bilan ayblov e’lon qilingan. Jinoyat ishi 2024 yil 3 sentabr kuni ayblov xulosasi bilan jinoyat ishlari bo‘yicha Chilonzor tuman sudiga yuborilgan.

Shuningdek, tergov jarayonida ayblanuvchi Abdumannop Abdurahmonov “Umid avto”, “Orient avto”, “Business Orient auto”, “Orient auto hamkor”, “Umid auto xizmati”, “Umid avto companes” va “Orient auto Toshkent” MChJlarning rahbari sifatida faoliyat olib borgani aniqlangan”, deyiladi ma’lumotda.

Qo‘shimcha qilinishicha, tergovning to‘liqligini va qonun ustuvorligini ta’minlash maqsadida dastlab qo‘zg‘atilgan jinoyat ishidan Abdumannop Abdurahmonov va boshqalarning qismlari alohida ish yurituvga ajratilib, ayni damda jabrlanuvchilarga yetkazilgan moddiy zararni qoplash choralari ko‘rilmoqda. Tergov harakatlari jarayonida Abdumannop Abdurahmonov protsessual tartibda ushlangan.

Hozirda, jinoyat ishi bo‘yicha tergov harakatlari Toshkent shahar IIBB huzuridagi Tergov boshqarmasi tomonidan olib borilib, barcha aybdorlarni tergovga jalb qilish choralari ko‘rilmoqda. Tergov yakuniga ko‘ra qonuniy qaror qabul qilinishi ta’minlanishi bildirilgan.

Sud majlislari jadvaliga ko‘ra, Abdumannop Abdurahmonov, Muhammadmuso Nig‘monjonov hamda Ixtiyor Saidovga nisbatan qo‘zg‘atilgan jinoyat ishi Chilonzor tuman sudida ko‘rib chiqilmoqda. 2024 yil noyabr oyida boshlangan sud majlislari hali davom etmoqda. Jinoyat ishida 200 nafardan ortiq shaxs jabrlanuvchi sifatida o‘tgan.

Kun.uz oldinroq «Umid auto leasing»dan odamlar norozi ekani, firma bilan shartnoma tuzganlar pulini ham, mashinalarini ham ololmayotgani haqida surishtiruv e’lon qilgandi. Shu yil 6 yanvar kuni bo‘lgan suhbatda Abdumannop Abdurahmonov Kun.uz’ga izoh berib, mashinalar o‘z vaqtida topshirilmaganini 2022-2023 yillarda bir necha o‘nlab lizing kompaniyalar yoppasiga yopilib ketgani bilan izohlagan edi.