Malayziyada ayol oilasi bilan ko‘proq vaqt o‘tkazish uchun ishga har kuni samolyotda qatnayapti

Malayziyaning AirAsia aviakompaniyasida menejer yordamchisi bo‘lib ishlaydigan Rashil Kaur har kuni ofisiga samolyotda borib qaytadi. Gap shundaki, ayol oilasi bilan Penangda istiqomat qiladi, ishi esa Sepangda joylashgan. Bu ikki shahar orasidagi masofa taxminan 400 kilometrni tashkil etadi.

Kaurning kuni tonggi soat to‘rtdan boshlanadi, keyin u aeroportga yo‘l oladi va soat sakkizda ishda bo‘lish uchun qo‘shni shaharga uchadi. Bir tomonga parvoz taxminan 40 daqiqa davom etadi. Ishdan keyin ayol kechki reys bilan uyiga qaytadi.

Kaurning aytishicha, u farzandlari bilan ko‘proq vaqt o‘tkazish maqsadida har kuni ishga samolyotda borishga qaror qilgan. Ilgari u ofisi yaqinida ijaraga uy olib yashagan va oilasi bilan faqat dam olish kunlari ko‘rishgan.

“Har kuni ertalab soat to‘rtda turish odamni charchatadi. Biroq uyga qaytib, bolalarimni ko‘rganimda charchoq o‘z-o‘zidan yo‘qoladi”, — deb ta’kidladi Kaur.

Ayol 2024 yilning yanvar oyidan boshlab ishga uchib borishni boshlagan. Shu vaqt mobaynida u hatto mablag‘ tejashga muvaffaq bo‘ldi. Uning aytishicha, kvartirada yashagan paytlari oylik xarajatlari 474 dollar bo‘lgan, endi bu 316 dollarga tushgan.