Davlat kanselyariyasi va Bavariya raqamlashtirish vazirligi Myunxen xavfsizlik konferensiyasi ochilishi arafasida hakerlik hujumiga uchradi. Bu haqda 16 fevral, yakshanba kuni davlat axborot xavfsizligi boshqarmasiga tayanib, dpa agentligi xabar berdi.
Hujum Rossiya bilan bog‘liq
Bavariya hukumati DDoS-hujum 13 fevral kuni sodir bo‘lganini bildirdi. Hujumchilar ko‘p sonli ko‘rishlar bilan serverlarni ortiqcha yuklashga harakat qilishdi. Agentlik manbalarining ta’kidlashicha, hujum «rossiyaparast hakerlar faoliyati» bilan bog‘liq. Ularning so‘zlariga ko‘ra, hech qanday zarar ko‘rilmagan, ma’lumotlar o‘g‘irlanmagan, biroq hujumga uchragan saytlar vaqtincha ishlamagan.
Bayerischer Rundfunk mediakompaniyasi ma’lumotlariga ko‘ra, 13 fevral kuni ertalab Bavariya hukumati sayti taxminan olti soat davomida ishlamay qolgan, ekranda xato xabari paydo bo‘lgan. Bundan tashqari, Bavariya politsiyasi, shuningdek, Myunxen okrugi ma’muriyati va Bavariya poytaxti yaqinidagi Garxing shahri sayti ham DDoS-hujumga uchradi.
Bavariya jinoiy politsiya idorasi tergov olib bormoqda va hakerlik hujumi Myunxen xavfsizlik konferensiyasi yoki 24 yoshli afg‘onistonlik o‘sha kuni ish tashlaganlar ustiga mashina haydab borgani bilan bog‘liqmi, hozircha aniq ayta olmayapti. Ikki kundan keyin 37 yoshli ayol va uning ikki yoshli qizi olgan jarohatlari tufayli vafot etdi.
