Tramp YeIdan Ukrainaga tinchlikparvar kuchlarni yuborish g‘oyasini qo‘llab-quvvatladi

AQSh prezidenti Donald Tramp Vashington o‘t ochishni to‘xtatish rejimi joriy etilsa, Ukrainaga Yevropa Ittifoqi davlatlaridan tinchlikparvar kuchlarni yuborish ehtimoliga qarshi emasligini aytdi. Biroq, AQSh tinchlikparvar kontingentining Ukrainada bo‘lishi masalasi kun tartibida emas, dedi Amerika yetakchisi 18 fevral, seshanba kuni Mar-a-Lago qarorgohida bo‘lib o‘tgan brifingda.

Foto: Reuters

«U yerda (Ukrainada) qo‘shinlar joylashtirilsa yaxshi bo‘lardi, men bunga qarshi emasman», — dedi Tramp. Shu bilan birga, u Amerika tinchlikparvar kuchlari haqida gapirmayotganini tushuntirdi, chunki «biz uzoqdamiz». Ammo agar Yevropa davlatlari buni qilishni xohlasa, «bu ajoyib bo‘lardi», dedi Tramp.

Ukrainaga tinchlikparvar kuchlarni yuborish g‘oyasi Fransiya va Buyuk Britaniya tomonidan bir necha bor ilgari surilgan, ammo Yevropa Ittifoqi mamlakatlari o‘rtasida bu masala bo‘yicha hali kelishuv mavjud emas. Shu bilan birga, Moskva ehtimoliy o‘t ochishni to‘xtatishdan so‘ng Ukrainada G‘arb davlatlaridan tinchlikparvar kuchlarning bo‘lishiga qarshi va buni «qabul qilib bo‘lmaydi» deb atadi.