Associated Press Oq uyga kirish rad etilgani yuzasidan sudga murojaat qildi

Amerikaning Associated Press (AP) axborot agentligi AQSh prezidenti Donald Trampning uch nafar yuqori martabali yordamchisiga qarshi Oq uyning jurnalistlarning matbuot anjumaniga kirishini cheklash qarori yuzasidan sudga murojaat qildi. 21 fevral, juma kuni Vashingtondagi AQSh okrug sudiga taqdim etilgan da’vo arizasida Oval kabinetga va prezidentning Air Force One samolyotiga kirishning rad etilishi so‘z va matbuot erkinligini kafolatlovchi AQSh Konstitutsiyasiga kiritilgan birinchi tuzatishni buzishi aytiladi.

Sudda ayblanuvchilar Oq uy apparati rahbari Syuzan Uayls, uning o‘rinbosari Teylor Budovich va Oq uy matbuot kotibi Kerolin Livittdir. Agentlik bu qadami bilan «tahririyat mustaqilligi huquqini himoya qilmoqchi» ekanini tushuntirdi. «Qo‘shma Shtatlardagi matbuot va barcha odamlar o‘z so‘zlarini tanlash va hukumat ta’qibiga duchor bo‘lmaslik huquqiga ega», dedi AP.

Merilend shtatidagi Konservativ siyosiy harakatlar konferensiyasi (CPAC)da chiqish paytida da’vo bilan bog‘liq savollarga javob berar ekan, Livitt shunday dedi: «Biz to‘g‘ri pozitsiyani egallaganimizga ishonamiz. Biz har kuni Oq uyda haqiqat va aniqlik mavjudligini ta’minlashga sodiqmiz».

AP jurnalistlariga Oval kabinetga va Trampning samolyotiga kirish taqiqlandi

O‘tgan hafta Associated Press xodimlariga Oq uyning Oval kabineti va AQSh prezidentining Air Force One samolyotiga kirish taqiqlangan edi. Oq uy apparati rahbari o‘rinbosari Budovichning xabar berishicha, bu qaror tahririyat Trampning tegishli farmoniga qaramay, o‘z nashrlarida Meksika ko‘rfazining nomini Amerika ko‘rfazi deb o‘zgartirishdan bosh tortgani munosabati bilan qabul qilingan. «Associated Press Amerika ko‘rfazining geografik nomidagi qonuniy o‘zgarishlarni e’tiborsiz qoldirishda davom etmoqda», — deb yozgan Budovich X ijtimoiy tarmog‘ida agentlikni «noto‘g‘ri ma’lumot tarqatishda» ayblab. Shu bilan birga, u AP jurnalistlari va fotosuratchilari Oq uy majmuasiga tashrif buyurish huquqini saqlab qolishlariga aniqlik kiritdi.

Avvalroq, Google Maps xaritalash xizmati tomonidan AQShdagi foydalanuvchilar uchun Meksika ko‘rfazining geografik nomi Amerika ko‘rfaziga o‘zgartirilgan edi. AQSh Geologiya xizmati ham ko‘rfaz nomini o‘zgartirdi.

Tramp ikkinchi prezidentlik muddatining birinchi kunida nomni o‘zgartirish to‘g‘risidagi farmonni imzoladi.