Germaniyada muddatidan oldin parlament saylovlari boshlandi

Germaniyada bundestag (parlament) saylovlari uchun barcha ovoz berish uchastkalari ochildi, deb xabar beradi Associated Press.

Qayd etilishicha, ovoz berish jarayonlari mahalliy vaqt bilan soat 18:00 ga qadar davom etadi. Shundan keyin darhol ekzit-pollar natijasi paydo bo‘lishi kutilmoqda. Germaniya fuqarolari, shuningdek, pochta orqali ham ovoz berishlari mumkin bo‘ladi.

Agentlikning ta’kidlashicha, Yevropaning AQSh prezidenti Donald Tramp ma’muriyatini Ukraina inqirozi, qit’ada xavfsizlikni ta’minlash muammolariga nisbatan siyosatiga javobi ushbu saylovlar natijasiga bog‘liq.

Germaniya saylov tizimiga ko‘ra, kamdan kam hollarda biror-bir partiya mutlaq ustunlik bilan g‘alabaga erishadi; aftidan, kelayotgan haftada ikki yoki undan ortiq partiya hukmron koalitsiyani shakllantiradi. Jamoatchilik o‘rtasida o‘tkazilgan so‘rovlar ham shu kabi natijani ko‘rsatgan — biror-bir partiya fuqarolar orasida alohida mashhurlikka ega emas.

Jamoatchilik fikrini o‘rganish maqsadida o‘tkazilgan so‘rovlarda Fridrix Mersning Xristian-demokratik ittifoq va Xristian-sotsial ittifoq konservativ bloki yetakchilik qilgan, undan keyingi o‘rinlari Alisa Vaydelning «Germaniya uchun muqobil» hamda kansler Olaf Shols a’zosi bo‘lgan Germaniya sotsial-demokratlar partiyasi egallagan.

Eslatib o‘tamiz, o‘tgan yilning dekabr oxirlarida Germaniya prezidenti Frank-Valter Shtaynmayyer mamlakat parlamentini (bundestag) tarqatib yuborib, 2025 yil 23 fevral kuni muddatidan oldin parlament saylovlari o‘tkazilishini belgilagandi. «Hozirgidek murakkab davrda barqarorlikni ta’minlash uchun salohiyatli hukumat va parlamentda ishonchli ko‘pchilik talab etiladi», — degandi u.