O‘zbekiston, Tojikiston va Qirg‘iziston rahbarlari birinchi marta uch tomonlama sammit o‘tkazadi

Tojikistonning Xo‘jand shahrida O‘zbekiston, Tojikiston va Qirg‘iziston prezidentlari ishtirokida ilk bor uch tomonlama sammit bo‘lib o‘tadi. Bu haqda qirg‘iz hukumati rahbarining o‘rinbosari Edil Baysalov Jyenevada BMT Inson huquqlari bo‘yicha kengashining 58-sessiyasi ishida ma’lum qildi.

«U [Baysalov] 31 mart kuni Xo‘jandda tarixda birinchi marta Qirg‘iziston, Tojikiston va O‘zbekiston rahbarlarining uch tomonlama sammiti bo‘lib o‘tishini e’lon qildi», — deyiladi Qirg‘iziston hukumatining matbuot xizmati xabarida.

Uning so‘zlariga ko‘ra, sammit mintaqaviy hamkorlikni mustahkamlashda muhim qadamga aylanadi.

Uchrashuv Bishkek va Dushanbe o‘rtasidagi chegara muammosi yechimi fonida bo‘lib o‘tadi.

Eslatib o‘tamiz, Qirg‘iziston va Tojikiston hukumat delegatsiyalari 21 fevral kuni Bishkekda umumiy chegarani delimitatsiya qilish bo‘yicha kelishuvni imzolagandi. Hujjatlarni endi ikki mamlakat rahbarlari imzolashi kerak. «Biz chegaraning butun cho‘ziqligi bo‘yicha kelishuvni uzil-kesil yakunladik», — deya ta’kidlagan Qirg‘iziston Milliy xavfsizlik davlat qo‘mitasi raisi Qamchibek Tashiyev.

Shuningdek, Qirg‘iziston O‘zbekiston va Tojikiston bilan chegarada transport nazoratini kuchaytirishni rejalashtirayotgani to‘g‘risida xabar berilgandi.