Baxmalda “Open budget” puliga qurilgan yangi stadion 15 kunda qulab tushdi

Jizzax viloyatining Baxmal tumanida yaqindagina qurib bitkazilib, foydalanishga topshirilgan sun’iy qoplamali stadionning tom qismi qulab tushdi. Bu haqda Kun.uz’ning baxmallik kuzatuvchisi xabar berdi.

Tahririyatga jo‘natilgan foto va videolavhalarda ko‘rinishicha, stadionning tom qismi qorni ko‘tara olmay qulagan bo‘lishi mumkin. Bu paytda stadionda hech kim bo‘lmagan.

“Yaxshiyam qulaganda tagida bolalar bo‘lmagan. Milliard so‘mdan ortiq pul sarflandi bu stadionga. Shuncha pul qayerga ketdi, hayronmiz. “Tashabbusli budjet”da yutish uchun yonimizdan 160 mln so‘m sarflagandik”, deydi Kun.uz kuzatuvchisi.

Ochiq ma’lumotlarga ko‘ra, stadion tumanning Mustaqillik mahallasidagi 48-maktab hududida qurilgan. Loyiha “Tashabbusli budjet”ning 2024 yil 1-mavsumida 4 mingdan ortiq ovoz to‘plab, g‘olib deb topilgan. Loyihada stadion bilan birga maktabning issiqlik tizimini yaxshilash, ikkita filiali atrofini temir panjaralar bilan o‘rash ham bo‘lgan. Loyiha uchun 1 mlrd 360 mln so‘m mablag‘ ajratilgan.

Loyiha g‘olib deb topilgach, tender orqali pudratchi tashkilot aniqlangan. O‘tkazilgan tenderda 6 ta talabgor firma qatnashgan. Shundan “Suvinshootqurilishloyiha” MChJ eng ko‘p ball to‘plab, 1 mlrd 190 mln so‘m taklifi bilan g‘olib bo‘lgan.

“Suvinshootqurilishloyiha” MChJ 2008 yilda davlat ro‘yxatidan o‘tkazilgan. Uning yagona ta’sischisi Ixtiyor Muxammadiyev hisoblanadi. MChJ o‘tgan yillar davlat buyurtmalari bo‘yicha o‘tkazilgan o‘nlab tenderlarda g‘olib bo‘lgan.