GM Onix modelidagi kamchilik uchun katta miqdorda kompensatsiya to‘lashi mumkin

Braziliyada Chevrolet brendi bilan bog‘liq katta janjal boshlandi. Federal prokurorlar General Motors kompaniyasini 2012-2018 yillar davomida Lotin NCAP xavfsizlik testida reyting ololmagan 1 millionga yaqin Chevrolet Onix avtomobillarini sotgani uchun jazolamoqchi. 

Ular kompaniyadan bunday avtomobillardagi baxtsiz hodisalarda jabrlanganlarning barchasi uchun katta miqdorda ma’naviy zarar undirmoqchi. Umumiy kompensatsiya miqdori 2,5 mlrd real yoki 425 mln dollarni tashkil etishi mumkin. 

Da’vogarlarning ta’kidlanishicha, kompaniya Braziliya bozorida xavfsizlik talablariga javob bermaydigan avtomobillarni “ataylab sotgan”, chunki mahalliy zavodda boshqa mamlakatlar uchun ishlab chiqarilgan Onix’lar qo‘shimcha himoya vositalari bilan jihozlangan bo‘lgan.

2017 yilda mustaqil Lotin NCAP tashkiloti transport vositalarining xavfsizligini tekshirish maqsadida test o‘tkazadi, unda Chevrolet Onix yon ta’sir xavfsizligi bo‘yicha hech qanday reyting ololmaydi. Buning ortidan xaridorlar 2020 yilda kompaniyaga qarshi sudga da’vo arizasi kiritadi.

General Motors esa Lotin NCAP rasmiy tartibga soluvchi organ emasligini ta’kidlab, sotilgan Onix modellari o‘sha paytdagi milliy xavfsizlik qoidalariga mos kelishini iddao qilyapti.

Bundan tashqari, Braziliyadagi boshqa mashhur modellar: Renault Sandero, Renault Logan, Hyundai HB20, Citroen C3, Citroen C3 Aircross, Ford Ka va Fiat Argo'lar ham xavfsizlik testida past reyting olgan. 

E’tiborli jihati, xavfsizlikka bog‘liq e’tiroz paydo bo‘lishi bilan Chevrolet darhol mahalliy bozor uchun ishlab chiqarilayotgan mashinalarga ham eksport uchun chiqarilgan avtomobillarda bo‘lgani kabi, qo‘shimcha yon himoya xavfsizlik tizimini qo‘shgan.