Toshkent shahri hokimligi bir xonadonga 3 qopdan chiqindi limiti qo‘yilgani haqidagi xabarlarni rad etdi

Toshkent shahri hokimligi «Bir xonadonga 3 qopdan chiqindi limiti qo‘yilibdi» mazmunida ijtimoiy tarmoqlarda tarqalgan xabarlar asosiz ekanini ma’lum qildi.

«Bugungi kunda Toshkent shahrida maishiy chiqindilarni yig‘ish va olib ketish bo‘yicha hech qanday cheklovlar o‘rnatilmagan. Aholi va tadbirkorlik sub’yektlari uchun chiqindilarni to‘plash va olib chiqish bo‘yicha xizmatlar odatdagidek davom etmoqda», — deyiladi xabarda.

Hokimlik aholidan tekshirilmagan ma’lumotlarga ishonmaslikni, faktchekingdan foydalanishni so‘ragan. Buning uchun ishonchli va rasmiy axborot manbalari yetarli ekanini eslatib o‘tgan.

Ushbu xizmatlar yuzasidan savollar yoki fikrlar bo‘lsa quyidagi raqamlarga 71- 247−02−11, 71- 247−79−21 yoki @maxsustrans_support Telegram guruhiga murojaat qilish mumkin.