Husiychilar Qizil dengizda AQSh aviatashuvchi kemasiga hujum qilinganini bildirdi

Yamanning husiychilar guruhi o‘z jangchilari Qizil dengizdagi bir guruh AQSh harbiy kemalariga havo hujumi uyushtirganini da’vo qildi. 16 mart, yakshanba kuni AQShning USS Harry S. Truman aviatashuvchi kemasi va unga hamroh bo‘lgan harbiy kemalarga hujum uyushtirildi, deya xabar bermoqda AFP axborot agentligi husiychilar harbiy qanoti vakili Yahyo Sariya bayonotiga tayanib.

Husiychilarning aytishicha, hujumda 18 ta raketa va bitta dron ishlatilgan. Biroq, guruh bayonotida kemalarga berilgan zarbalar muvaffaqiyatli o‘tgani haqida ma’lumot berilmagan. Reuters axborot manbalariga tayanib, Amerika samolyotlari 11 ta dronni urib tushirganini xabar qildi. Husiychilar tomonidan uchirilgan raketa havoda portladi va Yaman hududiy suvlariga quladi.

AFP xabariga ko‘ra, aviatashuvchi kemaga ehtimoliy hujumdan oldin, Isroil va Hamas guruhi o‘zaro kelishuvga erishgan 19 yanvardan buyon mintaqada hech qanday harbiy amaliyot o‘tkazilmagan edi. Biroq 11 mart kuni ular Isroil kemalariga yana hujumlar uyushtirish bilan tahdid qilishdi, chunki Isroil G‘azo sektoriga insonparvarlik yordamini kiritishni to‘xtatdi.

Husiychilar Isroilga aloqador kemalarga yangi hujumlar bilan tahdid qildi

Yamanda husiychilar Isroilga G‘azo sektoriga gumanitar yordam yetkazish uchun bergan muddat tugaganidan keyin Isroil bilan bog‘liq kemalarga hujumlarni qayta boshlash bilan tahdid qilishdi. Bu haqda 12 mart kuni AFP agentligi yozgan.

Agentlik tomonidan keltirilgan isyonchilar bayonotida ular Qizil va Arab dengizlari, Bob al-Mandeb bo‘g‘ozi va Adan ko‘rfazida «barcha Isroil kemalarining o‘tishiga taqiq»ni yangilash niyatida ekani aytiladi.