Fransiya kompaniyasi O‘zbekistonda quriladigan kichik AES loyihasida ishtirok etishi mumkin

Jizzax viloyatida kam quvvatli atom elektr stansiyasini qurish loyihasiga Fransiya kompaniyalarini jalb qilish imkoniyati ko‘rib chiqilyapti. Bu haqda Atom energiyasi agentligi direktori Azim Axmadxo‘jayev Le Figaro nashriga bergan intervyusida ma’lum qildi.

«Ushbu loyiha uchun Fransiya, albatta, eng yaxshi yechim va yordamni taklif qilishi mumkin. Biz texnik hamkor sifatida Assystem’ni, shuningdek, Bureau Veritas (mutaxassislar tayyorlash uchun) va elektr stansiyalarini texnik boshqarish uchun yaxshi yechimlarni taklif etuvchi Framatome kabi bir qancha fransuz kompaniyalari bilan hamkorlikni muhokama qilmoqdamiz»,— degan «O‘zatom» rahbari.

Energetika vaziri Jo‘rabek Mirzamahmudovning ta’kidlashicha, Fransiya kompaniyalari O‘zbekistonga nafaqat investor, balki texnologik hamkor sifatida ham qiziqish bildirmoqda. Mahalliy bozor uchun mutaxassislar tayyorlash masalasi ham muhokama qilingan.

«Biz haqiqatan ham texnik mutaxassislarni tayyorlashimiz, ularni kompaniyalarimizning bu yerdagi ishi uchun talab qilinadigan ko‘nikmalar va usullarga o‘rgatishimiz kerak», — degan Fransiya va O‘zbekiston Iqtisodiy palatasi prezidenti Joanna Golas.

O‘zbekistonda qayta tiklanadigan energetika faol rivojlanmoqda va 2030 yilga borib energiya balansidagi qayta tiklanuvchi energiya ulushini 16 foizdan 54 foizgacha oshirish rejalashtirilgan.

Total Energies kompaniyasi Samarqand viloyatida 131 MVt quvvatga ega quyosh elektr stansiyasini ishga tushirdi, Voltalia esa Xorazmda 100 MVt quvvatga ega Sarimay Solar stansiyasini qurishni boshladi. U 2025 yilda ishga tushirilishi kutilmoqda.

Avvalroq, O‘zbekistonda atom energetikasi loyihalarini qo‘llab-quvvatlash va rivojlantirish, jumladan, Jizzax viloyatida kichik atom elektr stansiyasini qurish bo‘yicha xalqaro konsorsium tashkil etishni rejalashtirayotgani xabar qilingandi.