Isroil bir necha oylik tanaffusdan keyin yana Livan bo‘ylab zarbalar yo‘lladi

Isroil qo‘mondonligi Livan janubidagi «Hizbulloh» harakatining o‘nlab uchirish moslamalari va qo‘mondonlik markaziga zarba berilganini ma’lum qilgan.

Livan sog‘liqni saqlash vazirligi zarbalar oqibatida ikki kishi, jumladan, bir bola halok bo‘lgani va yana sakkiz kishi jarohatlanganini ma’lum qildi.

Livan armiyasi mamlakat janubida «uchta primitiv uchirish moslamasi» ishdan chiqarilganini ma’lum qilgan. Livan mudofaa vaziri surishtiruv ishlari boshlangani haqida xabar bergan.

Isroil armiyasi mamlakat shimolidagi Metula shahrida uchta raketa to‘xtatib qolinganini ma’lum qildi. Jabrlanganlar haqida ma’lumot yo‘q.

Livandagi eng yirik qurolli guruhlardan biri «Hizbulloh» Isroilni raketalar bilan o‘qqa tutganini rad etmoqda. Tashkilot vakillarining so‘zlariga ko‘ra, guruh 14 oy davom etgan to‘qnashuvlardan so‘ng Livanga nisbatan tinchlik olib kelgan sulhga sodiq qolmoqda.

Isroilning zarbalari AQSh va Fransiya vositachiligida tomonlar sulh tuzishga erishganidan keyingi eng jiddiy keskinlashuv bo‘lmoqda.

Kelishuv shartlariga ko‘ra, Livan armiyasi qurolli guruhlarning Isroilga hujumlarining oldini olish uchun mamlakat janubiga qo‘shimcha kuchlarni joylashtirishi kerak.

«Hizbulloh» o‘z jangarilarini qurollari bilan birga shimolga olib ketishga, Isroil esa Livan hududida urush boshlanganidan beri egallab turgan pozitsiyalaridan qo‘shinlarini olib chiqishga va’da bergandi.

Livan bo‘ylab zarbalar Isroil Hamas bilan sulhni bekor qilib, G‘azo sektoridagi amaliyotni tiklaganidan bir necha kun o‘tib yo‘llandi.