30-sentabr kuni FlyDubai aviakompaniyasining Dubaydan Isroil poytaxti Tel-Avivga parvozni amalga oshirgan yoʻlovchi samolyoti Saudiya Arabistoniga favqulodda qoʻndi. Samolyot parvoz boshlanganidan bir yarim soat vaqt oʻtganida avariya signalini yuborgan: dastlab xalqaro umumiy favqulodda vaziyat signali boʻlgan 7700 kodi, biroz oʻtib esa noqonuniy aralashuv yoki samolyotni egallab olish haqida xabar berish uchun qoʻllanadigan 7500 kodi uzatilgan. Xuddi shu vaqtda samolyot yoʻnalishdan ogʻgan va keskin pasaya boshlagan: u bir daqiqadan kamroq vaqt ichida balandlikni teng yarmiga yoʻqotgan. Isroil terakt ehtimoli tufayli qiruvchi samolyotlarni havoga koʻtargan. Ammo yakunda samolyot aloqaga chiqqan va Saudiyaning Tobuk shahridagi aeroportga qoʻngan.
Isroillik rasmiylar samolyot uchuvchilari oʻrtasida mushtlashuv yuzaga kelgani haqida maʼlum qildi. Samolyot yoʻlovchilari orasida boʻlgan Mariyam ismli ayol i24News nashriga avvaliga uchuvchilar kabinasidan qichqiriq ovozi eshitilgani, keyin esa kabina eshigi ochilib ketgani va yoʻlovchilar ichkarida qon toʻkilganiga guvoh boʻlishganini aytib bergan. U uchuvchilardan biriga pichoq bilan jarohat yetkazilganini maʼlum qilgan. Jabrlangan uchuvchiga yoʻlovchilar orasidagi shifokor va hamshira tomonidan tez tibbiy yordam koʻrsatilgan. Yoʻlovchilar orasida fuqarolik kiyimidagi uchuvchilar ham bor edi va aynan ular samolyot boshqaruvini qoʻlga olishgan va uni Tobukka olib kelishgan.
Uchuvchilardan biri samolyotni qulatmoqchi boʻlgani haqidagi versiya tekshirilmoqda. Ikkinchi uchuvchi havo kemasi kapitaniga pichoq bilan bir necha bor zarba bergan. Taxminlarga koʻra, aynan u boshqaruvni oʻz qoʻliga olishni va samolyotni bortdagi barcha yoʻlovchilar bilan birga qulatishni xohlagan. Bu oʻzini oʻldirishga urinish yoki terakt maqsadidagi harakat boʻlgani aniq emas. Bir necha yoʻlovchi va ekipaj aʼzolari uchuvchilar kabinasiga kirib borishgan va uni toʻxtatishgan, deb xabar bergan isroillik jurnalist Amit Segal. U mazkur samolyot ichida olingan va kiyimi qonga belangan erkak suratini namoyish etgan.
Avvaliga uchuvchilar Rossiya va Ukraina fuqarolari ekani haqida xabarlar tarqalgandi. Rossiya propagandasi allaqachon bu maʼlumotni keng tarqatdi (Vladimir Solovyovning telegram-kanalida «Ukrainalik boʻlgan iikkinchi uchuvchi rossiyalik kapitanga bir necha bor pichoq bilan jarohat yetkazgani» haqida yozilgan), ammo bu maʼlumot tasdiqlanmadi. Ayrim xabarlarga koʻra, samolyotda chindan ham ukrain va rus millatiga mansub uchuvchilar boʻlgan, lekin ular uchuvchilar kabinasida emas, yoʻlovchilar orasida boʻlishgan.
