Ertaga barcha davlat tashkilotlarida bir soatga “svet” o‘chiriladi

25 mart kuni O‘zbekistonda barcha davlat tashkilotlarida 1 soatga elektr energiyasi ta’minoti to‘xtatiladi. Bu haqda Ekologiya vazirligi xabar berdi.

Ma’lum qilinishicha, bu 25 mart – “Yer soati” kuni munosabati bilan o‘tkazilayotgan maxsus aksiya hisoblanadi. Maqsad tabiiy resurslarni asrash va bu orqali sayyoramizga g‘amxo‘rlik ko‘rsatishdir.

“Barchangizni ushbu aksiyaga befarq bo‘lmaslikka va kun davomida atigi 60 daqiqaga elektr energiyasidan foydalanmaslikka chaqiramiz”, deyiladi vazirlik xabarida.

Ma’lumot uchun, “Yer soati” har yili xalqaro miqyosida o‘tkaziladigan yirik ekologik aksiya hisoblanadi. Mazkur tadbir 2007 yilda Jahon Yovvoyi tabiat fondi (WWF) tomonidan tashkil qilingan. Tashkilotchilar ekologik muammolardan tashvishlanish ramzi sifatida sayyora aholisini 60 daqiqaga chiroq va maishiy elektr uskunalarini o‘chirib qo‘yishga chaqiradi. Shuningdek, butun dunyo bo‘ylab mashhur bino va obidalarni yoritib turuvchi chiroqlar ham o‘chiriladi.