Parijdagi referendum natijasi: yana 500 ta ko‘cha piyodalarga ajratiladi

Parij aholisi referendumda hukumatning yana 500 ta ko‘chani piyodalar ko‘chasiga aylantirish g‘oyasini qo‘llab-quvvatladi. Shahar meri Ann Idalgoning 24 mart, dushanbaga o‘tar kechasi xabar berishicha, ushbu masala bo‘yicha ovoz berishda ro‘yxatga olingan 1,4 millionga yaqin saylovchining atigi 4 foizi qatnashgan. Biroq ularning 66 foizi bu g‘oyani yoqlab chiqdi.

Parijning 20 ta munitsipal okrugining (arrondismanlari) har birida 25 tadan ko‘cha piyodalar uchun mo‘ljallangan qilib qo‘yilishi rejalashtirilgan – aniq qaysi biri ekani mahalliy darajada hal qilinadi. Bu masala bo‘yicha maslahatlashuvlar «yaqin haftalarda» boshlanadi, deydi shahar rasmiylari. Bundan tashqari, ushbu rejaga ko‘ra, yaqin bir necha yil ichida Fransiya poytaxtida 10 mingtagacha avtomobillar to‘xtash joyini yo‘q qilish rejalashtirilgan.

Idalgoning aytishicha, parijliklar referendumda shovqin va havo ifloslanishiga qarshi ovoz bergan. Shuningdek, u ko‘chalarni ko‘kalamzorlashtirish global iqlim o‘zgarishiga qarshi kurashishda yordam berishi mumkinligini ta’kidladi.

Sotsialist merning «yashil» tashabbuslari va ularni tanqid qilish

Umuman olganda, Parijda 6 mingdan ortiq ko‘chalar mavjud, ulardan 220 ga yaqini allaqachon faqat piyodalar uchun mo‘ljallangan. Deyarli barcha avtomobil ko‘chalarida tezlik chegarasi 2021 yilda soatiga 30 kilometrgacha pasaytirildi. Maktablar yaqinida avtomashinalar harakati cheklangan.

Sotsialistik partiya vakili Ann Idalgo boshchiligida Parij bir necha yillardan beri yo‘l harakati xavfsizligini yaxshilash va atrof-muhitni muhofaza qilish majburiyatini olgan. Idalgo ma’muriyati avtomobillar harakatini cheklashdan tashqari, velosiped yo‘llari tarmog‘ini ham kengaytirdi.

Boshqa tomondan, 2023 yilda Parijda elektr samokatlar ijarasi butunlay taqiqlangan. O‘shanda referendum ishtirokchilarining 89 foizi bu qadamni yoqlab ovoz bergan, ovoz berishda aholining atigi 7 foizi ishtirok etgan.

Konservativ muxolifat Idalgoning «yashil» tashabbuslarini tanqid qilib, ular soliq to‘lovchilarga qimmatga tushishini va avtomobillar harakatidagi cheklovlar, jumladan, savdo va favqulodda xizmatlarga to‘sqinlik qilishini ta’kidladi. Agar 2026 yilgi Parij saylovlarida konservatorlar g‘alaba qozonsa, yangi piyodalar zonalarini yaratish g‘oyasi xavf ostida qolishi mumkin.