Taxtaqoracha dovonida ayrim toifadagi transport vositalari harakati vaqtincha cheklandi

M-39 “Toshkent-Termiz” avtomobil yo‘lining Taxtaqoracha dovonidan o‘tgan qismida ayrim toifadagi transport vositalari harakati cheklandi. Bu haqda Qashqadaryo viloyati hokimligi axborot xizmati xabar berdi. 

Ma’lum qilinishicha, xalqaro ahamiyatga ega M-39 “Toshkent-Termiz” avtomobil yo‘lining Taxtaqoracha dovonidan o‘tgan qismida yo‘l torligi, xavfli burilish joylarining radiusi kichikligi, oldinda harakatlanib ketayotgan yuk mashinasining sekin harakatlangani tufayli quvib o‘tishning imkoni yo‘qligi noqulayliklar tug‘dirmoqda.

Shu sababli avtomobil yo‘lining Taxtaqoracha dovoni hisoblangan 1135-1145 kilometrlari oralig‘ida aniqlangan kamchiliklar bartaraf etilgunga hamda yo‘lni III toifadan II toifaga o‘zgartirgunga qadar yo‘lovchi tashish uchun mo‘ljallangan M2, M3 hamda N3 toifadagi transport vositalari harakatlanishi vaqtincha cheklangan. Bu orqali harakat xavfsizligini ta’minlash va yo‘l-transport hodisalarining oldini olish maqsad qilingan.

Dovonda harakati cheklangan transport vositalari toifalari quyidagilar:

• M2 toifasi — yo‘lovchilarni tashish uchun foydalaniladigan va haydovchining o‘rindig‘idan tashqari o‘rindiqlar soni 8 tadan ortiq, eng katta vazni 5 tonnadan ortiq bo‘lmagan avtotransport vositalari;
• M3 toifasi — yo‘lovchilarni tashish uchun foydalaniladigan va haydovchining o‘rindig‘idan tashqari o‘rindiqlar soni 8 tadan ortiq, eng katta vazni 5 tonnadan ortiq bo‘lgan avtotransport vositalari;
• N3 toifasi — yuk tashish uchun mo‘ljallangan, eng katta vazni 12 tonnadan ortiq bo‘lgan avtotransport vositalari.