Janubiy Koreya tarixidagi eng yirik o‘rmon yong‘inlarida gumonlanuvchi qo‘lga olindi

Janubiy Koreya janubi-sharqida o‘rmon yong‘inlariga sabab bo‘lishda gumonlanayotgan shaxs politsiya tomonidan qo‘lga olindi, deb yozadi Hankyoreh nashri.

Kensan-Pukto provinsiyasida yashovchi 56 yoshli erkak o‘rmon himoyasi to‘g‘risidagi qonunni buzishda gumonlanib ushlangan. U 22 mart kuni soat 11:24 da Kvesan qishlog‘idagi o‘rmon hududida yong‘in yuzaga kelishiga sababchi bo‘lgan.

Gumonlanuvchi o‘z aybini inkor etgan. Ammo yong‘in haqida birinchi bo‘lib xabar qilgan uning qizi guvohlik ko‘rsatmasini bergan.

«Katta bobomizning qabristonida yong‘in boshlandi. Otam daraxtni sindirishga urindi, lekin uddalay olmadi, shu bois uni zajigalka bilan yoqishga qaror qildi. Biroq kuchli shamol tufayli uchqunlar tarqalib, yong‘in boshlandi», — deydi gumonlanuvchining qizi.

Iysonda boshlangan yong‘in tezda to‘rtta qo‘shni tuman — Andon, Chxonson, Anyan va Yondokka tarqalgan. Yong‘in ko‘lami kengayib ketgani bois 28 mart kuni Kensan-Pukto politsiyasi mahalliy Iyson hukumatidan tergov ishlarini o‘z nazoratiga olgan.

Ertasi kuni politsiya Sud ekspertizalari bo‘yicha milliy instituti bilan hamkorlikda yong‘in o‘chog‘ini ko‘zdan kechirgan. Ayni vaqtda O‘rmon tadqiqotlari milliy instituti, Sud ekspertizalari milliy instituti va o‘t o‘chirish xizmatlari bilan keyingi harakatlarni kelishish ustida ish olib borilmoqda.

Iysondagi yong‘in Janubiy Koreya tarixidagi eng halokatli o‘rmon yong‘iniga aylandi. Fojia oqibatida 26 kishi, jumladan, vertolyot uchuvchilari, o‘t o‘chiruvchilar va mahalliy aholi halok bo‘ldi.

Alanga 4 mingdan ortiq binoni, xususan, turarjoy binolari va zavodlar, tarixiy obektlarni kulga aylantirdi. Dastlabki ma’lumotlarga ko‘ra, yong‘in 45 ming gektardan ortiq maydonni egallagan — bu Seul hududining 75 foizi demak. Bu mamlakat tarixidagi eng katta o‘rmon yong‘ini talafoti hisoblanadi.