Le Pen Fransiya prezidentligiga o‘z nomzodini qo‘yishga va’da berdi 

4 yilga qamoq jazosiga hukm qilingan va besh yilga davlat lavozimlarida ishlash huquqidan mahrum etilgan Marin Le Pen sud qaroriga qaramay, Fransiya prezidentligiga nomzodini qo‘yish niyatida. 31 mart, dushanba kuni Fransiyaning TF1 telekanaliga bergan intervyusida u: «Men jangchiman, o‘zimni yo‘q qilishlariga yo‘l qo‘ymayman», dedi. Suhbat davomida u «hech qanday sharoitda» siyosatni tark etmasligini ham aytdi.

«Kichik yo‘l bor. Albatta, u tor, lekin mavjud», — deya izoh berdi o‘ta o‘ng siyosatchi 2027 yilgi saylovlarda Fransiya prezidentligiga nomzodini qo‘yish imkoniyatiga.

Marin Le Pen sud qarorini siyosiy va noqonuniy deb atadi. «Bugun tunda millionlab fransuzlar inson huquqlari mamlakati Fransiyada sudyalar avtoritar rejimlarning vakolati hisoblangan usullardan foydalanayotganini ko‘rib g‘azabda, ishonib bo‘lmas darajada g‘azabda», dedi u.

Ommaviy so‘rovlarga ko‘ra, Le Pen Fransiyadagi prezidentlik poygasida favorit bo‘lgan. Shunday qilib, mart oyi oxirida Fransiya jamoatchilik fikri instituti (IFOP) tomonidan o‘tkazilgan tadqiqot shuni ko‘rsatdiki, faqat ovoz berishning birinchi bosqichida saylovchilarning 34 foizidan 37 foizigacha uni qo‘llab-quvvatlashga tayyor. 2022 yilgi saylovlarda u birinchi turda 23,15 foiz ovoz olgan.