Panama AQSh qo‘shinlariga Panama kanali yaqinida joylashishiga ruxsat berdi

Vashington va Panama o‘rtasidagi yangi kelishuvga ko‘ra, AQSh qo‘shinlari Panama kanali bo‘ylab bir qancha obektlarda joylasha oladi. «Yuqori mansabdor shaxslar» tomonidan imzolangan hujjat tafsilotlari haqida 10 aprel, payshanba kuni AFP agentligi xabar berdi.

Agentlik ma’lumotlariga ko‘ra, kelishuv amerikalik harbiy xizmatchilarga harbiy tayyorgarlik, manyovrlar va boshqa bir qator tadbirlarni o‘tkazish uchun Panama nazoratidagi obektlarda joylashtirilishiga imkon beradi. Shu bilan birga, Qo‘shma Shtatlar u yerda yangi harbiy obektlar qura olmaydi.

Biroq, bu shaklda ham, kelishuv Vashingtonga o‘n yillar oldin Panama kanaliga egalik qilgan paytda AQSh tomonidan qurilgan sobiq harbiy bazalarda cheklanmagan miqdordagi qo‘shinlarni joylashtirish huquqini beradi, deb ta’kidlaydi AFP. Agentlik buni AQSh prezidenti Donald Trampga Vashingtonning dengiz yo‘lidagi ta’sirini tiklashga qaratilgan katta imtiyoz deb atadi.