YeK rahbari: AQSh bilan muzokaralar muvaffaqiyatsizlikka uchrasa, bigtex zarar ko‘radi

Yevropa Ittifoqi, agar AQSh prezidenti Donald Tramp muzokaralardan so‘ng ittifoq bilan savdo urushini to‘xtatmasa, Amerikaning yirik texnologiya kompaniyalariga soliq solishga tayyor. Bu haqda Yevrokomissiya rahbari Ursula fon der Lyayyen 10 aprel, payshanba kuni chop etilgan Financial Times gazetasiga bergan intervyusida aytib o‘tdi.

YeK rahbarining so‘zlariga ko‘ra, Vashington joriy etgan Yevropa Ittifoqi tovarlariga bojlar bo‘yicha «keng ko‘lamdagi qarshi choralar mavjud». Bunga misol sifatida, raqamli xizmatlar reklamasidan tushadigan daromad solig‘i bo‘lishi mumkin, bu butun Yevropa Ittifoqida qo‘llanadi, deydi Ursula fon der Lyayyen.

YeK rahbari yaqinda Yevropa Ittifoqida yaratilgan «majburlashga qarshi vosita» ACI (Anti Coercion Instrument)ni nazarda tutmoqda. U dastlab Yevropa Ittifoqining iqtisodiy manfaatlarini Amerika texnologiya kompaniyalaridan himoya qilish chorasi sifatida taqdim etilgan. Xususan, ACI ularga soliq solish, Yevropa iqtisodiyotiga sarmoya kiritishni taqiqlash, intellektual mulk huquqlarini cheklash va boshqa bir qator sanksiyalarni qo‘llash imkonini beradi.

Ba’zi ommaviy axborot vositalari va siyosatchilar paketni «bazuka» deb atashgan va hozirgacha bu qurol ishlatilmagan, deb ta’kidlaydi FT.

Fon der Lyayyenning ta’kidlashicha, Yevropa Ittifoqi Vashington bilan avvalroq Donald Tramp tomonidan e’lon qilingan 90 kunlik «kechikish» vaqtida tariflar bo‘yicha «to‘liq muvozanatli» kelishuvga erishishni afzal ko‘radi. Biroq, okeanning qarama-qarshi qirg‘og‘idagi hamkorlar «endi status-kvoga qaytmaydi», deb ta’kidladi YeK rahbari.