Tomorqa yer egalari va dehqon xo‘jaliklari qo‘llab-quvvatlanadi

Hujjat bilan Kambag‘allikni qisqartirish va bandlik vazirligi huzuridagi Dehqon xo‘jaliklari va tomorqa yer egalari faoliyatini qo‘llab-quvvatlash jamg‘armasi to‘g‘risidagi nizom tasdiqlandi. Jamg‘arma prezidentning «Tomorqa yer egalari va dehqon xo‘jaliklari faoliyatida zamonaviy tashkiliy tizimni joriy qilish va moliyaviy qo‘llab-quvvatlashning qo‘shimcha chora-tadbirlari to‘g‘risida»gi farmoni bilan tashkil etilgan.

Shuningdek, jamg‘arma mablag‘lari hisobidan grant, subsidiya, kredit va lizing ajratish tartibi ham tasdiqlandi.

Jamg‘arma mablag‘larini shakllantirishning asosiy manbalari:

• O‘zbekiston fermerlar kengashi huzuridagi Fermer xo‘jaliklarini qo‘llab-quvvatlash jamg‘armasidan o‘tkazib beriladigan mablag‘lar;
• O‘zbekiston davlat budjetidan ajratiladigan transfertlar;
• jamg‘armaga yuklatilgan vazifalarni bajarish uchun jalb qilinadigan xalqaro moliya institutlari, xorijiy hukumat moliya tashkilotlari va boshqa donorlarning kreditlari (qarzlari) va grantlari;
• jamg‘armaning, shu jumladan vaqtincha bo‘sh turgan mablag‘larini depozit hisobraqamlariga joylashtirishdan olinadigan daromadlari.

Jamg‘arma mablag‘lari hisobidan quyidagi moliyaviy qo‘llab-quvvatlash turlari ko‘rsatiladi:

• har yili 500 ta mahalladagi bittadan xonadon tomorqasida amalga oshirilgan eng namunali va innovatsiya loyihalari uchun BHMning 100 baravarigacha grantlar ajratiladi;
• usta dehqonlar tomonidan qisqa muddatli o‘quv kurslarini tashkil etish bilan bog‘liq xarajatlarni qoplash maqsadida har bir kurs uchun BHMning 15 baravarigacha subsidiya ajratish;
• tomorqalarda eksportbop mahsulot yetishtirishni yo‘lga qo‘ygan dehqonlarga 100 mln so‘mgacha subsidiya ajratish;
• suv ta’minoti cheklangan hududlarda yer uchastkalarini sug‘orish uchun tik quduqlarni burg‘ilash va ishga tushirish, suv chiqarish vositalarini sotib olish, irrigatsiya tarmoqlarini tortish bilan bog‘liq xarajatlarning bir qismini qoplashga subsidiyalar;
• qishloq xo‘jaligi mahsulotlarini yetishtirish, qayta ishlash, quritish, saqlash va qadoqlash loyihalari uchun 2 yilgacha imtiyozli davr bilan 7 yilgacha muddatga Markaziy bankning asosiy stavkasidan 4 foizli punkt yuqori stavkada (shundan, 5% bank marjasi) kreditlar;
• aholi tomorqalari va ijara yer uchastkalarida ixcham muzlatkichli omborxonalar, qadoqlash, quritish va qayta ishlash uskunalari, tayyor holdagi issiqxonalarni 24 oylik imtiyozli davr bilan 5 yilda bo‘lib to‘lash sharti bilan lizingga berish.