Abu-Dabining suveren investitsiya fondi Mubadala va Abu-Dabi milliy energetika kompaniyasi TAQA O‘zbekistondagi “Talimarjon” energetika majmuasida joylashgan 875 MW quvvatga ega birlashtirilgan siklli gaz elektr stansiyasini sotib olish jarayonini yakunladi. Bu haqda 30 may kuni Mubadala va TAQA birgalikda X tarmog‘idagi sahifasida e’lon qildi.
Stansiyani boshqarish uchun tuzilgan “Talimarjan Power Plant 1” MChJda BAAning ikki kompaniyasi 40 foizdan ulushga ega bo‘ldi. Qolgan 20 foiz O‘zbekiston tomonidan “Talimarjon issiqlik elektr stansiyasi” AJga tegishli.
Davlat reyestriga ko‘ra, “Talimarjan Power Plant 1” MChJ 2023 yil 1 mart kuni ro‘yxatga olingan. Ustav kapitali – 109,7 mln so‘m. Rahbari – Sergey Tazin, u muqaddam Rossiyadagi elektr stansiyalarida ishlagan.
2023 yil 1 mart kuni “Talimarjan Operations and Maintenance” MChJ ham ro‘yxatdan o‘tkazilgan. Kompaniya stansiyani eksplutatsiya qilish bilan shug‘ullanadi. Undagi ulushlar ham yuqoridagidek 40-40-20 nisbatda taqsimlangan.
Korporativ axborotlar portaliga ko‘ra, “Talimarjon issiqlik elektr stansiyasi” AJ aktivlarni topshirish jarayoni boshlangani haqida 30 aprel kuni xabar bergan.
Gulf Business'ning yozishicha, “Talimarjon Power Plant 1” – O‘zbekiston energetika infratuzilmasining muhim tarkibiy qismi bo‘lib, “O‘zenergosotish” AJ bilan 25 yillik elektr energiyasi xaridi bo‘yicha shartnomaga ega.
Bitim e’lon qilinganiga 5 kun bo‘lsa-da, hukumat bu borada biror rasmiy ma’lumot e’lon qilmadi. Kun.uz qo‘shimcha tafsilotlarni so‘rab Energetika vazirligi hamda Investitsiyalar, sanoat va savdo vazirligiga so‘rov yubordi.
