Odamlar ko‘chadagi biror oshxonada ovqatlansa, oshpaz yoki ofitsiantdan yarim hazil, yarim chin aralash “Eshak go‘shti qo‘shilmaganmi?” deb so‘raydigan bo‘lishdi. Afsuski, bu savol o‘z-o‘zidan paydo bo‘lib qolgani yo‘q. Qashqadaryodan Toshkent shahriga olib kelinayotganda aniqlangan 361 kg eshak go‘shti voqeasi poytaxtga tonnalab iste’molga yaroqsiz go‘sht mahsulotlari kirib kelayotgan bo‘lishi mumkinligini ko‘rsatdi.
Qozondan bir cho‘mich
25 may kuni Sirdaryoda 361 kilogramm eshak go‘shtini olib ketayotgan haydovchi to‘xtatib qolindi. Qarshi—Toshkent yo‘nalishi bo‘ylab harakatlanib kelayotgan Lacetti mashinasi to‘xtatilib, xolislar ishtirokida ko‘zdan kechirilgan. Tekshiruv davomida mashinaning yukxonasidan go‘sht mahsulotlari topilgan.
Suhbat davomida haydovchi ushbu go‘sht mahsulotlari o‘ziga tegishli emasligini, balki uni aytilgan manzilga olib ketayotganini bildirgan.
Sirdaryo viloyati IIB JTSB karantin tadbirlarini ta’minlash guruhi xodimining so‘zlariga ko‘ra, transport vositasida noma’lum hayvonga tegishli 361 kilogramm go‘sht borligi aniqlangan. Ushbu go‘sht mahsulotlari Sirdaryo viloyati Veterinariya va chorvachilikni rivojlantirish boshqarmasi laboratoriyasiga topshirilgan va ular eshak go‘shti ekani tasdiqlangan.
Hozirda holat yuzasidan Sirdaryo tumani IIB tergov bo‘limi tomonidan surishtiruv ishlari olib borilayotgani bildirilgan.
Afsuski, bu holat qozondan bir cho‘mich xolos: Toshkent shahriga tonnalab eshak go‘shti olib kelinayotgan va bularning barchasi ham aniqlanmayotgan bo‘lishi mumkin.
“Kilosini 20 ming so‘mdan sotardim”
Eshak so‘yib sotishni kimlardir biznesga aylantirib olgan. Yaqinda shunday kimsalar jinoiy jazoga tortildi. Ya’ni Toshkent viloyatida eshak so‘yib sotgan va ushbu go‘shtni xarid qilgan yigitlar sud hukmi bilan ozodlikdan mahrum etildi.
Sud hujjatida keltirilishicha, 2025 yil 7 yanvar kuni huquqni muhofaza qiluvchi organlar xodimlari tomonidan Toshkent viloyatida tezkor o‘rganish o‘tkazilgan. Unda mahalla hududidagi qarovsiz dala shiyponida 23 ta tirik va 15 ta so‘yilgan holdagi eshak topilgan.
2025 yil 9 yanvar kuni Hikmat (materialdagi barcha ismlar o‘zgartirilgan) dala shiyponida eshaklarni so‘yib, go‘shtini iste’mol uchun o‘tkazish maqsadida olib ketayotganda Nurafshon shahri hududida ushlangan. Tadbir davomida u 200 kg eshak go‘shtini Toshkent shahrida yashovchi Asomiddinga kilosini 20 ming so‘mdan sotishga kelishganini aytgan. Hikmat o‘z ixtiyori bilan tezkor tadbirda ishtirok etishini ma’lum qilib, aybiga iqrorlik va pushaymonlik bildirgan.
