Kanada Chubays va Putinning sobiq xotiniga qarshi sanksiyalar kiritdi

Kanada Ukrainadagi urush uchun Rossiyaga nisbatan joriy qilingan sanksiyalarni kengaytirdi. Kanada hukumati saytida 17 iyun, seshanba kuni kechqurun e’lon qilingan xabarga ko‘ra, endi jarima ro‘yxatiga yana 77 jismoniy va 39 yuridik shaxs, shuningdek, Rossiyaning «soyadagi floti» deb ataluvchi 201 ta kema kiritilgan.

Qora ro‘yxatga «Rosnano» korporatsiyasining sobiq rahbari, prezident ma’muriyati sobiq rahbari va bosh vazirning birinchi o‘rinbosari Anatoliy Chubays, Rossiya sobiq prezidenti Boris Yelsinning qizi Tatyana Yumasheva, uning turmush o‘rtog‘i, prezident ma’muriyatining sobiq rahbari Valentin Yumashev, shuningdek, Rossiyaning amaldagi prezidenti Vladimir Putinning sobiq rafiqasi Lyudmila Ocheretnaya kiritilgan.

Sanksiyaga tushganlar orasida Lyudmila Ocheretnayaning turmush o‘rtog‘i Artur Ocheretniy, Vladimir Putinning qarindoshlari Mixail Putin va Mixail Shelomov, Rossiya prezidentining yaqin atrofidagi bir qancha boshqa shaxslar, yirik tadbirkorlar, jumladan Vladimir Yevtushenkov, Vladimir Lisin va Aleksandr Mamut ham bor.