XVJ Ukraina uchun yarim milliard dollarlik transhni ma’qulladi

Ukraina Xalqaro valuta jamg‘armasi (XVJ)dan yana yarim milliard AQSh dollari miqdoridagi kredit transhi oladi. Xalqaro valuta jamg‘armasi direktorlar kengashi Kiyevga kengaytirilgan kreditlash mexanizmi (EFF) orqali ushbu transhni ajratishni ma’qulladi, deya xabar beradi fond o‘zining rasmiy saytida 30 iyun, dushanba kuni. Ukraina uchun EFF 2023 yil 31 martda tasdiqlangan.

«Xalqaro valuta jamg‘armasi ijroiya kengashi bugun EFF'ning sakkizinchi sharhini yakunladi, bu hukumatga budjetni qo‘llab-quvvatlash uchun 0,5 milliard dollardan foydalanish imkonini berdi. Bu XVJ tomonidan qo‘llab-quvvatlanadigan dastur doirasidagi to‘lovlarning umumiy hajmini 10,6 milliard dollarga yetkazadi», deyiladi hujjatda.

Mart oyi oxirida XVJ Ukraina davlat budjetini qo‘llab-quvvatlash uchun 400 million dollarlik transh ajratilishini ma’qulladi. Jamg‘armaning ta’kidlashicha, og‘ir sharoitlarga qaramay, Ukraina hukumati barcha miqdoriy mezonlarga javob berishga va yangi to‘lovni olish uchun tarkibiy ko‘rsatkichlarning aksariyatiga erisha oldi.

30 iyun kuni Ukraina Moliya vazirligi defolt xavfi tufayli Ukraina kreditorlarga yalpi ichki mahsulotning varrantlari — davlat obligatsiyalari bo‘yicha davlat qarzi bilan bog‘liq 665 million dollar miqdoridagi to‘lovni to‘lay olmasligini ma’lum qildi.

Kiyev 2 iyun kuni amalga oshirishi kerak bo‘lgan to‘lov 2023 yildagi iqtisodiy o‘sish bilan bog‘liq. Ukraina bu qarzni 2024 yilda to‘lashi kerak edi, biroq o‘shanda uning rasmiylari obligatsiyalar to‘lovlariga moratoriy joriy qildi. Endi Kiyev qarz qayta tuzilmaguncha moratoriy o‘z kuchida qolishini aytdi.

Bu summani to‘lamaslik davlatning iqtisodiy barqarorligini buzmaydi, chunki o‘tgan yili Kiyev kreditorlar bilan shartnomalardan o‘zaro defolt bandini olib tashlashga kelishib olgan edi, deya ta’kidladi Moliya vazirligi.