Klichko Germaniya kanslerini Ukrainaga TAURUS raketalarini berishga chaqirdi

Kiyev meri Vitaliy Klichko Germaniyadan Rossiya Federatsiyasining Ukrainaga qarshi keng ko‘lamli harbiy tajovuziga qarshi mudofaa uchun keyingi harbiy yordamga umid qilmoqda. 6 iyul, yakshanba kuni Bild am Sonntag gazetasida chop etilgan maqolasida u Germaniya kansleri Fridrix Mersni Ukrainani TAURUS qanotli raketalari bilan ta’minlashga chaqirdi.

«Kansler Fridrix Mers bundan avval juda to‘g‘ri ta’kidlagan ediki, Rossiyaning tinch aholi obektlariga tinimsiz hujumlari TAURUS raketalari yetkazilishiga olib kelishi kerak. Germaniyaning yangi hukumati o‘z so‘zida turadi, deb umid qilamiz», — deb yozadi Kiyev meri Bild uchun maqolasida.

Klichko Rossiyaning o‘z mamlakatiga qarshi uyushtirgan harbiy tajovuzini har kuni kechasi tobora keskinlashib borayotgan «sof terror» deb atadi. «Faqat bizning shahrimizda ikki mingta bino vayron bo‘ldi, yaradorlar va halok bo‘lganlar soni ortib bormoqda», — dedi u.

Kiyev merining so‘zlariga ko‘ra, Putin o‘t ochishni to‘xtatish, tinchlik va urushni tugatishni istamasligini yaqqol ko‘rsatdi. «Putinning maqsadlari mutlaqo aniq. U qanchalik qimmatga tushmasin, butun Ukrainani o‘z nazorati ostiga olmoqchi. Va agar biz uni Ukrainada birgalikda to‘xtatmasak, u keyin boshqa mamlakatlarga kirib keladi», — deya ishonch bildirdi Klichko.