Rossiyada Belgoroddagi o‘g‘irlik uchun milliard rubl undirilmoqchi

Rossiya Federatsiyasi Bosh prokuraturasi Ukraina bilan chegarada himoya inshootlari qurilishi tashkilotchilaridan deyarli bir milliard talab qildi. Gap Belgorod viloyatida katta miqdordagi mablag‘larni o‘g‘irlash haqida ketyapti.

Foto: picture-alliance/dpa/Sputnik/N. Seliverstova

Rossiya Bosh prokuraturasi Belgorod viloyatining Ukraina bilan chegarasida himoya inshootlari qurilishi chog‘ida yirik hajmdagi o‘g‘irlik holati bo‘yicha deyarli bir milliard rubl undirishni talab qilib, sudga da’vo arizasi kiritdi, deb yozadi «Kommersant» gazetasi 11 iyul, juma kuni da’vo arizasi nusxasiga tayanib.

Hujjatga ko‘ra, 2022-2024 yillarda Belgorod viloyatiga Ukraina bilan chegarada istehkomlar (vzvod istehkomlari, tankka qarshi piramidalar, duglar, texnika uchun istehkomlar, xandaqlar, ariqlar va boshqalar) qurish uchun federal budjetdan 19,5 milliard rubl ajratildi.

2022 yildan beri mablag‘larning asosiy boshqaruvchisi Belgorod viloyati qurilish vazirligi bo‘lib kelgan. Viloyat hukumati qarori bilan o‘sha paytda Aleksey Soshnikov rahbarlik qilgan viloyat «Kapital qurilish boshqarmasi» davlat budjet tashkiloti bosh pudratchi bo‘ldi. Boshqarma ishini viloyat hokimining o‘rinbosari – mulk va yer munosabatlari vaziri Rustem Zaynullin nazorat qilgan.

«Nazorat chora-tadbirlari natijasida Zaynullin va Soshnikov o‘z mansab mavqeyidan shaxsiy maqsadlarda hamda uchinchi shaxslarning manfaatlarini ko‘zlab mamlakat mudofaasi uchun ajratilgan budjet mablag‘lari hisobidan noqonuniy boyish maqsadida foydalangani aniqlandi», deyiladi Rossiya Federatsiyasi Bosh prokuraturasining da’vo arizasida.

Nazorat organining ma’lumotlariga ko‘ra, Zaynullin va Soshnikov novosibirsklik tadbirkor Sergey Petryakovni (unga tegishli «Stroyinvestrezerv» MChJ orqali ular mansabdor shaxslarga pul o‘tkazgan), shuningdek, uning biznes sherigi, Sankt-Peterburgdagi "Region Sibir" MChJ asoschisi Dmitriy Borovlevni jalb qilgan.