Stokholmda AQSh-Xitoy savdo muzokaralari boshlandi

AQSh va Xitoy Stokholmda savdo muzokaralarining yangi bosqichini boshladi. Bu haqda 28 iyul, dushanba kuni Shvetsiya bosh vaziri Ulf Kristersson idorasi xabar berdi.

AQSh moliya vaziri Skott Bessent va Xitoy bosh vaziri o‘rinbosari Xe Lifen boshchiligidagi uchrashuv AQSh va Yevropa Ittifoqi o‘rtasida savdo kelishuvi e’lon qilinganidan bir kun o‘tib boshlandi, deb xabar beradi AFP.

Stokholmda Shvetsiya hukumati qarorgohi oldida ikki davlat bayroqlari ko‘tarildi. Muzokaralar ikki kun davom etishi kutilmoqda.

Shu bilan birga, AQSh prezidenti Donald Tramp 28 iyul kuni Shotlandiya g‘arbidagi Ternberri shahridagi golf kurortida Xitoy o‘z bozorlarini dunyoning qolgan qismiga ochishini istashini aytdi.

«Xitoy bilan munosabatlarimiz yaxshi, ammo Xitoy - qattiq. Biz hammamiz qattiqmiz, ha, lekin nima bo‘lishini ko‘ramiz... Men Xitoy o‘z mamlakatini ochishini istardim», — deya Oq uy rahbarining so‘zlarini keltiradi Reuters.