In vitro ko‘chatlarini sotib olishga subsidiya ajratiladi

Vazirlar Mahkamasi qarori bilan In vitro sharoitida ko‘paytirilgan payvandtagli meva va tok ko‘chatlarini xarid qilish xarajatlarining bir qismini qoplash tartibi to‘g‘risidagi nizom tasdiqlandi.

Nizom quyidagi tartiblarni belgilaydi:

muvofiqlik sertifikati mavjud bo‘lgan in vitro sharoitida ko‘paytirilgan payvandtagli meva va tok ko‘chatlarini sotib olish xarajatlarining bir qismini qoplash uchun arizalar berish va ularni ko‘rib chiqish;
payvandtagli meva va tok ko‘chatlarini sotib olish xarajatlarining bir qismini qoplashga subsidiyalar ajratish;
payvandtagli meva va tok ko‘chatlarini parvarishlash majburiyatlarini bajarilishini nazorat qilish.

Subsidiyalar Agrosanoatni rivojlantirish agentligi huzuridagi Agrosanoatni rivojlantirish va qo‘llab-quvvatlash davlat jamg‘armasi mablag‘lari hisobidan quyidagi miqdorlarda ajratiladi:

muvofiqlik sertifikati (ixtiyoriy) mavjud bo‘lgan «in vitro» sharoitida ko‘paytirilgan payvandtagli meva daraxtlarini sotib olish qiymatining 50 foizi yangi intensiv bog‘ barpo etgan va ularni dala chetlariga, kanallar, sug‘orish va kollektor-drenaj tarmoqlari atrofiga ekkan talabgorga, lekin bitta payvandtagli meva daraxtiga 25 ming so‘mdan oshmagan miqdorda;
muvofiqlik sertifikati mavjud bo‘lgan danaksiz va yangi tok navlariga 7,5 ming so‘m va mahalliy tok ko‘chatlariga 2 ming so‘mdan oshmagan miqdorda.

Ma’lumot uchun: in vitro (lot. — «shisha ichida») — «probirkada», ya’ni sun’iy sharoitlarda, organizm yoki tabiiy muhitdan tashqarida o‘tkaziladigan tajribalarni anglatuvchi atama.