Germaniyada Zelenskiy ofisi rahbarining sobiq o‘rinbosari uyida tintuv o‘tkazildi

Ukraina Milliy aksilkorrupsiya byurosi (NABU) tergovchilari prezident Volodimir Zelenskiy devoni rahbarining sobiq o‘rinbosari Rostislav Shurmaning uyida tintuv o‘tkazdi. Der Spiegel jurnalida chop etilgan maqolaga ko‘ra, nemis tergovchilari NABU talabiga binoan 15 iyul kuni Bavariya federal yerining Shtarnberg shahridagi Shurmaning uyida tintuv o‘tkazgan.

«Germaniyadagi reyd nozik bir vaqtda o‘tkazildi: oradan bir hafta o‘tgach, prezident Zelenskiy Korrupsiyaga qarshi kurashish milliy byurosi va boshqa davlat idorasi (Korrupsiyaga qarshi ixtisoslashtirilgan prokuratura (SAP)ni vakolatlaridan mahrum qildi», — deyiladi nashrda. 41 yoshli ukrainalik siyosatchi Rossiyaning Ukrainaga qarshi davom etayotgan urushi paytida Bavariyaga qanday ko‘chib kelgani aniqlashtirilmagan.

«Ukrainskaya pravda» (UP) nashri avvalroq xabar qilganidek, prezident devoni rahbari Andrey Yermakning iqtisodiy masalalar bo‘yicha o‘rinbosari «manfaatlar to‘qnashuvi va Amerika rasmiylarining bosimi» tufayli prezident ma’muriyatidan bo‘shatildi. Shundan so‘ng UP suhbatdoshining ta’kidlashicha, OAVda Shurmaning akasi kompaniyalariga «yashil tarif» qoplanishi haqida ma’lumot e’lon qilinganidan so‘ng, xalqaro hamkorlar u bilan ishlashdan bosh tortgan.

Amaldorni ishdan bo‘shatish bo‘yicha yakuniy qaror o‘tgan yilning bahorida, prezident Volodimir Zelenskiy va AQSh davlat kotibi Entoni Blinken o‘rtasidagi suhbatlardan so‘ng qabul qilingan, deb yozadi Ukrainaning NV nashri. Zelenskiy Shurmani 2024 yil 3 sentabrda ishdan bo‘shatgan.