Ukrainada Luxansk viloyati ma’muriyati sobiq rahbari Sergey Gayday hibsga olindi

Luxansk viloyati va Karpatorti viloyati Mukachevo tumanining sobiq rahbari Sergey Gayday Ukrainada ikki oyga hibsga olindi. U uchuvchisiz uchoqlar va radioelektron urush uskunalarini oshirilgan narxlarda sotib olish bo‘yicha korrupsion sxemada ayblangan.

Foto: AP

Ukraina Oliy aksilkorrupsiya sudi Luxansk viloyati davlat ma’muriyati (VDM) sobiq rahbari Sergey Gaydayni ikki oyga hibsga oldi. Bu haqda 4 avgust, dushanba kuni Kiyevdan DW muxbiri xabar berdi.

Sud hukmiga ko‘ra, Gayday 10 million grivna (taxminan 2,1 million yevro) garov evaziga ozod etilishi mumkin. Advokatlar ehtiyot chorasi ustidan shikoyat qilishga va’da berdi, chunki ularning fikricha, garov sobiq amaldorning daromadiga mos emas.

Gayday 1975 yilda Luxansk viloyatida tug‘ilgan. Xmelnitskiyda tahsil olgan, Kiyevda ishlagan. 2019-2023 yillarda u Luxansk viloyati davlat ma’muriyatini boshqargan. 2024 yilning mart oyida u Ukraina g‘arbidagi Karpatorti viloyatining Mukachevo tumani rahbari etib tayinlangan.

2 avgust kuni amaldor Korrupsiyaga qarshi kurashish milliy byurosi va Ukraina ixtisoslashtirilgan antikorrupsiya prokuraturasi xodimlari tomonidan qo‘lga olingan. U uchuvchisiz uchoqlar va radioelektron urush uskunalarini oshirilgan narxlarda sotib olish bo‘yicha korrupsion sxemaga aloqadorlikda gumon qilinmoqda. 3 avgust kuni Gayday Mukachevo ma’muriyati rahbari lavozimidan ozod etildi.

Gayday o‘z aybini rad etdi. U «hech qayerga qochib ketmoqchi emasligini» va «bularning barchasi tugagach, frontga ketishini» aytdi.