Rossiyada million yuk tashuvchi, haydovchi va omborchi tanqisligi yuzaga keldi

Rossiyaning logistika sanoatida 1 million xodim yetishmovchiligi yuzaga keldi, deb xabar berdi bozor ishtirokchilari «Izvestiya» nashriga. Gap yuk tashish, omborda saqlash va ta’minot zanjirlarini boshqarish sohalari haqida bormoqda.

Avgust oyida, Superjob ma’lumotlariga ko‘ra, logistika sohasida yuk tashuvchi haydovchilar, butlovchi ishchilar, transport logistikasi menejerlari, omborchilar va yuk tashuvchilar eng ko‘p talabga ega bo‘lgan.

Logistika xodimlar tanqisligi eng yuqori bo‘lgan 5 ta sohaga kirdi: Moskva va Moskva viloyati, Sankt-Peterburg, Sverdlovsk, Novosibirsk, Rostov viloyatlari va Tataristonda kadrlar tanqisligi eng kuchli sezilmoqda, deb ta’kidladi tahlilchilar.

2025 yil birinchi yarmida ish beruvchilar tomonidan yog‘och tashuvchi haydovchilar uchun takliflar soni 129 foizga, yengil avtomobillar uchun esa 80 foizga oshdi, deb xabar berdi «Avito Rabota» xizmati. Kompaniya buni «yakka tartibdagi uy-joy qurilishi, infratuzilma loyihalari, shuningdek, shahar transportiga bo‘lgan talabning rivojlanishi» fonida kadrlar yetishmasligi bilan bog‘ladi. Iyul oyida eng ko‘p bo‘sh ish o‘rinlari haydovchilar, qadoqlovchilar va butlovchilar, omborchilar, mashinistlar va kurerlar uchun joylashtirilgan.

Fevral oyi oxirida logistika kompaniyalari vakillarining «Izvestiya» nashriga aytishicha, bozor ishtirokchilarining deyarli uchdan bir qismi xarajatlarning oshishi, yuk tashish tariflarining pasayishi va boshqa omillar tufayli bankrotlik arafasida qolgan. Ommaviy yopilish xavfi fonida logistika kompaniyalari bosh vazir Mixail Mishustindan sug‘urta badallari va ular bo‘yicha stavkalarni to‘lashni kechiktirishni, imtiyozli kreditlar, xodimlarning ish haqi uchun subsidiyalar joriy etishni, shuningdek, lizing to‘lovlarini qoplashni so‘radi.

Shunga qaramay, yanvar-mart oylarida har beshinchi transport kompaniyasi tarmoqni tark etdi, deb xabar berdi aprel oyida «AvtoGruzEks» uyushmasi. Uning ma’lumotlariga ko‘ra, Rossiya yuk tashuvchilarining qariyb 30 foizi qarzlar va lizing to‘lovlarini to‘lay olmaslik tufayli biznesni to‘xtatgan.