UBS universiteti: O‘zbekistonda xalqaro ta’limni rivojlantirishda yangi bosqich
|14:00 / 13.08.20258 19114 min
Reklama
"University of Business and Science" (UBS) - O‘zbekistondagi zamonaviy ta’lim muassasasi bo‘lib, xalqaro hamkorlik, ilg‘or infratuzilma va talabalarga taqdim etilgan keng imkoniyatlari orqali ta’lim sohasida yetakchi o‘rin egallab kelmoqda.
Foto: University of Business and ScienceFoto: University of Business and Science
Ana shu yo‘nalishdagi muvaffaqiyatlari tufayli UBS "Brand Awards International 2024" mukofotiga loyiq deb topildi. Ushbu e’tirof universitetning brend strategiyasi, raqamli transformatsiya va innovatsion xizmatlar borasidagi yutuqlarini xalqaro miqyosda tasdiqladi.
UBS — global yondashuvga ega, zamonaviy bilimlarni shakllantiruvchi oliy ta’lim muassasasi bo‘lib, O‘zbekistonni xalqaro ta’lim maydonida munosib tarzda namoyon etmoqda.
Zamonaviy kampuslar va yotoqxona sharoitlari
UBS beshta zamonaviy kampusga ega bo‘lib, ularning to‘rttasi Namangan viloyatida, biri esa Toshkent shahrida joylashgan. Talabalar uchun qulay va zamonaviy yotoqxonalarning mavjudligi, o‘quv jarayonini yanada samarali o‘tishiga yordam beradi.
Hozirda UBSʼda 49 ta bakalavriat, 14 ta magistratura va 5 ta doktorantura yo‘nalishlarida 25 mingdan ortiq talabalar ta’lim olmoqda. Shuningdek, ilmiy-tadqiqotlar bilan shug‘ullanuvchi 30 nafar doktorant ham universitetda o‘z izlanishlarini olib bormoqda. E’tiborlisi shuki, 2024-2025 yillar mobaynida 200 dan ortiq magistrantlar UBSʼni bitirib, davlat namunasidagi diplomni qo‘lga kiritdi hamda ish bilan ta’minlandi.
Talabalar uchun qanday grant va stipendiyalar mavjud?
Yo‘nalishlar bo‘yicha iqtidorli yoshlarni aniqlash, ularning ijodiy salohiyatini rivojlantirish va qo‘llab-quvvatlash maqsadida, o‘quv yili davomida yuqori baholarga ega bo‘lgan talabalar uchun bir semestrlik grantlar ajratiladi.
Har bir semestr yakunida imtihon natijalariga ko‘ra eng yaxshi 300 nafardan ortiq talaba bepul o‘qish huquqiga ega bo‘ladi. Bugungi kunga qadar 1 000 dan ortiq talaba ushbu imtiyozdan foydalangan.
Shuningdek, abituriyentlar UBSʼning ichki imtihon markazlarida oflayn imtihon topshirib, muvaffaqiyatli o‘tgach, 1 mln, 2 mln va 3 mln so‘mlik vaucherlar bilan taqdirlanadi.
Mavzuga oid
Bundan tashqari, IELTS, CEFR yoki Milliy sertifikatga ega bo‘lgan talabalarga kontrakt to‘lash uchun chegirmalar taqdim etiladi. Bilim va salohiyati yuqori yoshlarni qo‘llab-quvvatlash maqsadida esa 9 oy davomida to‘lanadigan stipendiyalar joriy qilingan. UBS ijtimoiy adolat tamoyillariga asoslanib, kam ta’minlangan oila farzandlari hamda ayol-qizlar uchun alohida imtiyozlarni taqdim etadi. Bu tashabbus jamiyatning barcha qatlamlaridan bo‘lgan iqtidorli yoshlarga teng imkoniyat yaratishga qaratilgan.
Talabalar o‘rtasidagi birdamlikni mustahkamlash maqsadida "Friyends" va "Family" dasturlari ham joriy etilgan:
— “Friyends” dasturi asosida sinfdoshingiz bilan birga o‘qisangiz, kontrakt to‘loviga 10% chegirma taqdim etiladi.
— “Family” dasturi orqali aka-uka, opa-singil yoki turmush o‘rtog‘ingiz bilan ta’lim olsangiz ham 10% chegirma beriladi.
Xalqaro hamkorliklar va ta’lim dasturlari: kelajakdagi imkoniyatlar
UBS universiteti dunyoning nufuzli oliy ta’lim muassasalari bilan hamkorlikda o‘quv dasturlari va ilmiy-tadqiqot loyihalarini muvaffaqiyatli amalga oshirib kelmoqda. Xususan, Janubiy Koreyaning Sejong, Dongshin hamda Kyungdong universitetlari bilan 2+2 qo‘shma ta’lim dasturlari bo‘yicha hamkorlik kelishuvlari imzolangan. Bu tashabbuslar asosida talabalar global darajadagi bilim va tajriba orttirish imkoniyatiga ega bo‘lmoqda.
Ushbu universitetlar bilan tuzilgan kelishuv doirasida UBS talabalari global biznes, IT, turizm, elektrotexnika, arxitektura va qurilish muhandisligi yo‘nalishlari bo‘yicha turli almashinuv dasturlari hamda amaliyot o‘tash imkoniyatiga ega bo‘ladi.
Kelishuv faqat talabalargagina emas, balki professor-o‘qituvchilarga ham qisqa muddatli amaliyotlar va malaka oshirish imkoniyatlarini bermoqda. Bunga misol tariqasida Turkiyaning Karabuk universiteti hamda Malta davlati universitetida amalga oshirilgan amaliyot dasturlarini keltirish mumkin. Ushbu darslar orqali UBS ustozlari zamonaviy ta’lim texnologiyalari, ilg‘or pedagogik yondashuvlar va o‘quv jarayonlarini samarali boshqarish bo‘yicha qimmatli tajribalarga ega bo‘ldi.
UBS vakillari global akademik hamkorlikni yanada mustahkamlash yo‘lida dunyoning eng nufuzli oliygohlari bilan aloqalarni kengaytirmoqda. Jumladan, “Harvard University”, “Massachusets Institute of Technology” (MIT) hamda AQShning TOP-5 muhandislik universitetlari qatoriga kiruvchi “Illinois Institute of Technology” bilan talaba va o‘qituvchilar uchun qo‘shma dastur va amaliyotlarni tashkil etish bo‘yicha hamkorlik olib borilmoqda. UBSʼda MIT ta’lim andazasi asosida o‘quv dasturlarini joriy etish rejalashtirilgan bo‘lib, bu orqali jahon miqyosida raqobatbardosh mutaxassislarni tayyorlashga zamin yaratilmoqda.
Shuningdek, dunyo reytingida (THE) TOP-350 talikka kiradigan Yaponiyaning Tsukuba universiteti bilan ikki tomonlama almashinuv dasturlari, qo‘shma ta’lim kurslari, ilmiy seminarlar hamda sun’iy intellekt va innovatsion yechimlarni ta’limga integratsiya qilish bo‘yicha hamkorlik yo‘lga qo‘yilgan.
Talabalarning bilim olishi, o‘sishi va o‘zini erkin ifoda etishi uchun qulay muhit yaratish har bir zamonaviy universitetning ustuvor vazifalaridan biri sanaladi. UBS universiteti mazkur tamoyilga amal qilgan holda, yoshlarning nafaqat akademik, balki ijodiy salohiyatini yuzaga chiqarishga qaratilgan bir qator tashabbuslarni amalga oshirib kelmoqda.
Shunday loyihalardan biri — “UBS xabarnomasi” axborot gazetasi bo‘lib, u har oy muntazam tarzda chop etiladi. Mazkur gazeta talabalarning mustaqil fikrlash, ijodiy izlanish olib borish va o‘z qobiliyatlarini namoyon etishlari uchun ochiq sahnani taqdim etadi. Unda talabalar she’r, hikoya, esse, fotoreportaj, tadqiqotlar va shaxsiy kuzatishlarini e’lon qilib, o‘z ijod mahsulini keng auditoriyaga yetkazish imkoniga ega bo‘lmoqda. “UBS xabarnomasi” nafaqat axborot manbasi, balki talabaning shaxsiy va kasbiy rivojlanishiga xizmat qiluvchi platforma vazifasini bajarmoqda. Bu tashabbus orqali universitet ijodga qiziquvchi talabalarni rag‘batlantirib, ularning o‘z fikrini ommaviy tarzda ifodalash madaniyatini shakllantirmoqda.
Bundan tashqari, UBS universiteti tomonidan “Zakovat” nodavlat-notijorat tashkiloti bilan hamkorlikda tashkil etilgan “UBS Zakovat Olimpiadasi” intellektual musobaqasi ham yoshlar o‘rtasida katta qiziqish uyg‘otgan. Mazkur olimpiada doirasida minglab bilimdon o‘quvchilar o‘z intellektual salohiyati, tezkor tafakkur darajasi, mantiqiy fikrlash qobiliyati va jamoaviy ishlash ko‘nikmalarini sinovdan o‘tkazadi. Ta’kidlash joizki, musobaqada faqat o‘quvchilar emas, balki universitetning o‘qituvchilari, xodimlari ham ishtirok etish imkoniyatiga ega bo‘ladi — ular uchun alohida guruhlar va bosqichlar tashkil etiladi.
Bu musobaqa UBSʼda fikrlovchi, tadqiqotga qiziquvchi va ijodkor avlodni shakllantirishda muhim o‘rin egallab kelmoqda.
Diplomdan ishgacha — UBS siz bilan!
University of Business and Science (UBS) o‘z bitiruvchilarining mehnat bozorida raqobatbardosh bo‘lishini ta’minlash maqsadida Karera markazini tashkil etdi. Ushbu markaz talabalar va bitiruvchilarga ishga joylashish, amaliyot o‘tash hamda malaka oshirish bo‘yicha zarur ko‘mak va imkoniyatlar taqdim etadi.
Mazkur tashabbus doirasida Toshkent shahri hamda vodiy bo‘ylab UBS Kambag‘allikni qisqartirish va bandlik vazirligi bilan hamkorlikda “Karera kuni” mehnat yarmarkasi tashkil etildi.
Natijada talabalarning 90–95 foizi amaliyotga qabul qilinib, ish bilan ta’minlandi. Bu esa yoshlar bilan ish beruvchilar o‘rtasida samarali muloqot maydonini yaratish borasidagi sa’y-harakatlar samarasidir.
Fan va ilm: Xalqaro konferensiyalar va olimpiadalar
So‘nggi yillarda UBS universiteti ilm-fan va xalqaro hamkorlik yo‘nalishiga jiddiy e’tibor qaratib, akademik hamjamiyatda o‘z o‘rnini mustahkamlab bormoqda. 2024-2025 o‘quv yili davomida universitet tomonidan 10 dan ortiq xalqaro va mahalliy ilmiy konferensiyalar muvaffaqiyatli tarzda tashkil etildi. Shuningdek, professor-o‘qituvchilar 20 dan ziyod nufuzli xalqaro va respublika miqyosidagi anjumanlarda faol ishtirok etdi. Yaqinda universitetning Kuzatuv kengashi raisi, texnika fanlari doktori, professor Elyorjon Jumayev boshchiligidagi jamoa AQShning Las-Vegas shahrida bo‘lib o‘tgan “TMS Annual Meyeting 2025” xalqaro konferensiyasida ishtirok etib, taqdim etilgan ilmiy ish eng yuqori baholarga sazovor bo‘ldi.
Bundan tashqari, universitet olimlari tomonidan chop etilgan ilmiy maqolalar Q1-Q2 reytingli, ya’ni dunyoning eng nufuzli ilmiy jurnallarida e’lon qilindi.
Q1 (1-toifa) jurnallar – bu faqatgina ilmiy dolzarbligi yuqori, metodologik jihatdan puxta yondashilgan va tadqiqot sifati mukammal bo‘lgan maqolalarni qamrab oladigan eng yuqori reytingli jurnallar toifasidir.
Universitetimiz olimlarining ilk ilmiy maqolasi “Appliyed Mathematics and Mechanics (English Edition)” jurnalida chop etildi. Ushbu jurnal o‘z sohasi bo‘yicha dunyo miqyosida TOP-10 likka kiradi va yuqori reytingga ega. Bu yutuq universitetimiz ilmiy salohiyatining yorqin ifodasi bo‘lib, ustozlarimizning mehnati va fidoyiligi samarasi hisoblanadi.
Ayni paytda UBS olimlari tomonidan bir necha nufuzli ilmiy jurnallarda maqolalar e’lon qilinmoqda. Bu muvaffaqiyat nafaqat universitetimiz, balki mamlakatimiz ilmiy salohiyati va obro‘sini yuksaltirishda muhim rol o‘ynaydi.
Ta’lim sifati va akademik rivojlanishni qo‘llab-quvvatlash maqsadida universitet pedagoglari tomonidan tayyorlangan 50 dan ortiq darslik va o‘quv adabiyoti O‘zbekiston Respublikasi prezidentining farmoni hamda Oliy ta’lim, fan va innovatsiyalar vazirligi buyrug‘i asosida nashr etishga ruxsat oldi. Bu adabiyotlar zamonaviy o‘quv standartlariga mos bo‘lib, o‘quv jarayonini samarali tashkil etish va fanlarni chuqur o‘zlashtirish imkonini beradi. Ushbu tasdiq pedagogik jamoaning bilimga bag‘ishlangan fidokorona mehnati e’tirofidir.
“University of Business and Science” tomonidan Oliy ta’lim, fan va innovatsiyalar vazirligi hamda Fan olimpiadalari markazi hamkorligida har yili an’anaviy tarzda o‘tkazilayotgan “UBS fan olimpiadasi” yosh avlodning intellektual salohiyatini rivojlantirish hamda ilmga bo‘lgan qiziqishini oshirishga xizmat qilmoqda.
Yildan yilga olimpiadaning miqyosi kengayib, sovrin jamg‘armasi va ishtirokchilar soni ortib bormoqda. 2023 yilda Namangan viloyatida 15 mingga yaqin o‘quvchi ishtirok etgan bo‘lsa, 2024 yilda vodiy bo‘yicha 30 mingga yaqin o‘quvchini qamrab oldi.
Joriy yilgi UBS Fan olimpiadasi respublika miqyosida o‘tkazildi va ikki bosqichdan iborat bo‘ldi. Birinchi bosqich onlayn shaklda o‘tkazilib, unda 120 mingdan ortiq 9-, 10- va 11-sinf o‘quvchilari ona tili va adabiyot, matematika, tarix, biologiya hamda ingliz tili fanlaridan bilimlarini sinovdan o‘tkazishdi. Ikkinchi bosqich esa oflayn shaklda bo‘lib o‘tdi va eng iqtidorli 11 mingdan ortiq o‘quvchi final bosqichda g‘oliblik uchun kurashdi.
Final bosqichida ishtirok etgan barcha 11-sinf o‘quvchilarga UBS tomonidan maxsus sertifikatlar taqdim etildi. Ushbu sertifikatlar eng yaxshi natija ko‘rsatgan yoshlarni universitetga imtihonsiz qabul qilish imtiyozini taqdim etdi.
Olimpiada yakunida ishtirokchilarga va ularning ustozlariga umumiy qiymati 10 milliard so‘mga teng grantlar, imtiyozlar va qimmatbaho sovg‘alar topshirildi. Bu tashabbus nafaqat yoshlar uchun qo‘shimcha motivatsiya, balki ta’lim muassasasi tomonidan bilimli avlodni qo‘llab-quvvatlashga qaratilgan amaliy qadamdir.
Bilim – investitsiya, UBS esa manzil
UBS universiteti o‘zining xalqaro hamkorliklari, ilg‘or o‘quv dasturlari va ta’limda yaratilgan keng imkoniyatlar bilan O‘zbekiston ta’lim tizimini yangilashga ulkan hissa qo‘shmoqda. Universitetning yuqori sifatli ta’limi, ilmiy-tadqiqot salohiyati va bitiruvchilarni qo‘llab-quvvatlash xizmati, UBSʼni O‘zbekistondagi eng nufuzli ta’lim muassasalaridan biriga aylantirmoqda.
Manzil: UBS Namangan — Namangan shahri Nodim Namongoniy ko‘chasi 5-uy (NTD), UBS Toshkent filiali — Toshkent shahri, Chilonzor tumani, “Yakkabog‘” MFY Gavhar ko‘chasi, 1-uy
