10 yoshli shaxmatchi Sivananda ayollar o‘rtasidagi eng yosh xalqaro master bo‘ldi

Londonlik 10 yoshli shaxmatchi Bodhana Sivananda xalqaro master unvonini olgan eng yosh ayol bo‘ldi. Shuningdek, avgust oyi boshida u Buyuk Britaniya chempionatida grossmeysterni mag‘lub etgan eng yosh ayol bo‘ldi. Bu haqda BBC xabar berdi.

«Sivananda 10 yosh, besh oy va uch kunlik paytida g‘alaba qozonib, amerikalik Karissa Yipning 2019 yildagi rekordini (10 yosh, 11 oy va 20 kun) ortda qoldirdi», deb xabar berdi mamlakat shaxmat federatsiyasi.

Bodhananing yangi unvoni - xalqaro master ayol - faqat ayollarga beriladigan ikkinchi eng yuqori unvon bo‘lib, grossmeysterdan keyin ikkinchi o‘rinda turadi. Grossmeyster shaxmatchi erishishi mumkin bo‘lgan eng yuqori unvon bo‘lib, u umrbod saqlanib qoladi.

Bir yil oldin Sivananda shaxmat bo‘yicha terma jamoaga kirgan mamlakatni xalqaro miqyosda himoya qilgan eng yosh britaniyalik sportchiga aylangan edi.

U birinchi marta Covid-19 pandemiyasi va karantin paytida 5 yoshida shaxmat o‘ynashni boshlagan. Birinchi shaxmat taxtasini u otasining Hindistonga qaytmoqchi bo‘lgan do‘stidan olgan. Dastlab Bodhana shaxmat donalaridan o‘yinchoq sifatida foydalangan, ammo keyinchalik o‘yin qoidalariga qiziqib qolgan. Uning oilasida qizning o‘zidan boshqa hech kim shaxmat o‘ynamaydi.

Uning otasi Siva avvalroq qizi o‘z iste’dodini qayerdan olganini bilmasligini aytdi, chunki u ham, rafiqasi ham muhandislik kasbiga ega bo‘lib, shaxmatni uncha yaxshi o‘ynamaydi.