Rostov, Belgorod va Volgogradga dronlar hujum qildi

14 avgust tongida Rostov-Don shahri markazidagi ko‘p qavatli uyga uchuvchisiz uchar qurilma hujum qilgan. Rostov oblasti gubernatori vazifasini bajaruvchi Yuriy Slyusarning so‘zlariga ko‘ra, hujum natijasida 13 kishi jarohatlangan, shundan ikki nafari bolalar. Yaralanganlarning olti nafari shifoxonaga yotqizilgan, kamida ikki nafari og‘ir ahvolda.

Telman va Lermontov ko‘chalari hududidagi 10 ta uyga zarar yetgan – ularning oynalari singan va balkonlari shikastlangan. Telegram-kanallarda kamida bitta uyning tomi qisman shikastlangani aks etgan fotosuratlar e’lon qilindi. Uylardan 212 kishi evakuatsiya qilindi, deya aniqlik kiritdi Slyusar.

Mash telegram-kanali ma’lumotlariga ko‘ra, Ukraina qurolli kuchlarining hujumi nishoni Rostovdagi Janubiy harbiy okrug shtabi bo‘lgan – dron aynan shu obekt tomon uchayotgandi, ammo shahar markazi ustida yo‘nalishini keskin o‘zgartirgan. U turar joy binosiga urilishiga nima sabab bo‘lgani ma’lum emas – radioelektron kurash vositalari unga ta’sir ko‘rsatgan bo‘lishi ham, bu navigatsiya xatosi yoki maqsadli hujum bo‘lishi ham mumkin. Kremlga xayrixoh hisoblangan Mash va Shot telegram-kanallari yozishicha, Ukraina qurolli kuchlari hujum uchun «Uchar tulki» deb nomlanuvchi, yengil motorli Aeropratk A-22 samolyoti asosida ishlab chiqilgan drondan foydalangan.

Belgorod qatorasiga ikkinchi kun hujumga uchradi. Gubernator aholi «yangi tarixda hali boshdan kechirilmagan kunlarni yashayotgani»ni aytdi

Belgorod kechadan buyon zarbalar nishoni bo‘lib turibdi. 13 avgust kuni gubernator Vyacheslav Gladkov oblastning turli rayonlarida ukrain dronlari hujumi oqibatida jarohatlanganlar borligi to‘g‘risida ma’lumot bergandi. Soat ertalabki 7 atrofida gubernator dron shahar markazidagi hukumat binosiga hujum qilganini aytdi – binoda kichik shikastlanish qayd etilgan, jarohat olganlar yo‘q. Bir soat o‘tib Gladkov Ukraina qurolli kuchlari hukumat binosiga to‘rtinchi bor zarba berganini aytib, shikastlanish aks etgan fotosuratlarni namoyish etdi.

Shahar markazi harbiy xizmatchilar va Yo‘l harakati xavfsizligi boshqarmasi kuchlari tomonidan to‘sib qo‘yilgan – hokimiyat binosi tomon hech kim o‘tkazilmagan. Guvohlar avtomatdan otilgan o‘q ovozlari hamda portlash ovozlarini eshitishgan, shahar ustida juda ko‘p dron uchib yurgan.

Hujumlar fonida oblast operativ shtabi navbatdan tashqari yig‘ilish o‘tkazdi, uning natijalariga ko‘ra, Belgorod shahri va Belgorod rayonidagi yirik savdo markazlarini shanba kuniga qadar yopish; yakshanbagacha barcha ko‘cha tadbirlarini taqiqlash, shuningdek, davlat va munitsipal muassasalar xodimlarini payshanba va juma kunlari masofadan ishlashga o‘tkazish to‘g‘risida qaror qabul qilindi. Bundan tashqari, Gladkov aholidan hujum xavfi tufayli ko‘chada iloji boricha kamroq bo‘lishni so‘radi.

Belgorodliklar ikkinchi kundirki «hali zamonaviy tarixda yashalmagan» kunlarni boshdan kechirmoqda, dedi Gladkov matbuot anjumanida Ukraina hujumlarini sharhlar ekan. Uning so‘zlariga ko‘ra, ertalabdan beri «hukumat binosiga maksimal darajada zarba berilmoqda». «Oldingizga kelayotganimda, oxirgi qavatga zarba keldi, shikastlanish katta edi. U yerda hamma narsa bor, birinchi qavat, mening xonam, duma», – dedi gubernator. Uning qo‘shimcha qilishicha, binoda faqat uch kishi qolgan, ular o‘z vazifalarini lavozim vakolatlari doirasida bajarmoqda – qolganlar u yerdan olib chiqilgan.

Rossiya Tergov qo‘mitasi Rostov-Don va Belgoroddagi fuqarolik obektlariga hujumlar yuzasidan teraktlar bo‘yicha jinoiy ishlar qo‘zg‘atilganini ma’lum qildi (JK 205-moddasi 2-qismi). Idora ma’lumotlariga ko‘ra, Belgorodda uch kishi jarohatlangan – og‘ir ahvolda bo‘lgan erkak, uning rafiqasi va yana bir tinch aholi vakili.

Volgograddagi neftni qayta ishlash zavodiga zarba

Ukraina qurolli kuchlari bosh shtabi payshanba kuni ertalab «Lukoyl»ga qarashli Volgograd neftni qayta ishlash zavodiga dronlar orqali zarba berilganini ma’lum qildi.

«Uchuvchisiz uchish apparatlarining zarbalari kuchli yong‘inlarga sabab bo‘ldi», - deyiladi Ukraina harbiylari bayonotida. Ularning ma’lumotlariga ko‘ra, Volgograddagi neftni qayta ishlash zavodi butun Rossiya qayta ishlashining 5,6 foizini tashkil etadi, zavod dizel, benzin va aviayoqilg‘i ishlab chiqaradi, ular Rossiya armiyasining «logistikasi uchun juda muhim» hisoblanadi.

Tunda dronlarning yopirilma hujumi haqida Volgograd oblasti gubernatori Andrey Bocharov xabar bergandi. Uning so‘zlariga ko‘ra, «parchalar tushishi oqibatida Volgograd neftni qayta ishlash zavodida neft mahsulotlari to‘kilishi va yonishi sodir bo‘lgan», jabrlanganlar yo‘q.

Gubernator yong‘inni o‘chirishga muvaffaq bo‘lingani haqida xabar bermagan.