HAMAS isroillik asirlarning yarmini ozod qilishga rozi bo‘ldi

Oxirgi ma’lumotlarga ko‘ra, HAMAS 49 kishini asirlikda ushlab turibdi. Isroil razvedkasi ulardan 27 nafari allaqachon halok bo‘lgan deb hisoblamoqda.

Foto: Global Look Press

HAMAS vositachi davlatlar – Misr va Qatarning G‘azo sektorida o‘t ochishni ikki oyga to‘xtatish va isroillik asirlarning yarmini ozod qilish taklifiga rozi bo‘ldi. Bu haqda AFP harakat vakillariga tayanib xabar berdi.

Oxirgi ma’lumotlarga ko‘ra, HAMAS 49 kishini asirlikda ushlab turibdi. Isroil razvedkasi ulardan 27 nafarini halok bo‘lgan deb hisoblamoqda.

AFP manbasining so‘zlariga ko‘ra, birinchi bosqichda o‘n nafar asirni ozod qilish va bir nechta jasadni topshirish taklif qilinmoqda.

«Qolgan asirlar ikkinchi bosqichda ozod qilinadi va darhol xavfsizlik kafolatlari ostida urushni to‘xtatish uchun kelishuv tuzish bo‘yicha muzokaralar boshlanadi»,— degan agentlik manbasi.

Isroil tomoni bu xabar bo‘yicha hozircha izoh bermagan.

#Isroil #Hamas