“60 yoshda ham avtobus kutishni istamasangiz ...” - Chirchiqdagi reklama e’tirozga sabab bo‘ldi

Kun.uz kuzatuvchilari tahririyatga yo‘llagan videoda Toshkent viloyati Chirchiq shahridagi bekatlardan biriga o‘rnatilgan chet tilini o‘rgatuvchi o‘quv markazi e’lonidagi yozuvga e’tibor qaratilgan.

Unda “60 yoshda ham avtobus kutib ishga borishni istamasangiz,, farzandingizga til o‘rgating” deb yozilgan.

“Reklama mazmuniga e’tibor bersangiz, unda yoshi kattalarni kamsitish, avtobus kutishni yomon va uyat ishdek ko‘rsatishga urinish bor. Holbuki, rivojlangan davlatlarda boylar va mansabdorlar ham jamoat transportidan foydalanadi”, deya e’tiroz bildirmoqda Kun.uz bilan bog‘langan vatandosh.

“Reklama to‘g‘risida”gi qonunga ko‘ra, reklamada ijtimoiy kelib chiqishi va ijtimoiy mavqeyiga qarab kamsitish taqiqlangan.

Kun.uz yuqoridagi holatga huquqiy yondashuv qanday bo‘lishi haqida reklama sohasidagi vakolatli organ – Raqobat qo‘mitasiga so‘rov yo‘lladi. So‘rov yo‘llanganidan so‘ng qariyb 2 soat o‘tib, qo‘mita ushbu holat bartaraf etilgani, reklama tezkorlik bilan barcha bekatlardan olib tashlanganini ma’lum qildi.