Parubiyning o‘ldirilishi: SBU gumondor qo‘lga olingani haqida xabar berdi

Ukraina ichki ishlar vaziri Igor Klimenko va SBU rahbari Vasil Malyuk Zelenskiyga Andrey Parubiy qotilligida gumonlanuvchining qo‘lga olingani haqida xabar berdi.

Foto: Roman Baluk/REUTERS

Oliy radaning sobiq spikeri Andrey Parubiyning o‘ldirilishida gumon qilingan shaxs qo‘lga olindi. Bu haqda Ukraina prezidenti Volodimir Zelenskiy 1 sentabr, dushanbaga o‘tar kechasi Telegramʼda ma’lum qildi va bu ma’lumotni unga Ukraina ichki ishlar vaziri Igor Klimenko va Ukraina xavfsizlik xizmati rahbari Vasil Malyuk taqdim etganini ta’kidladi.

«Kerakli tergov harakatlari davom etmoqda. Men mavjud ma’lumotlarni jamoatchilikka taqdim etishni buyurdim», — dedi Zelenskiy va «bu dahshatli qotillikning barcha holatlari aniqlanishi kerak» deya qayd etdi.

Shu bilan birga, SBU Telegramʼda erkak SBU xodimlari, Milliy politsiya va Bosh prokuratura ishtirokida Xmelnitskiy viloyatida qo‘lga olingani haqida xabar berdi. «Jinoyat fosh etildi va qo‘lga olish Ukraina prezidenti Volodimir Zelenskiyning shaxsiy nazorati ostida edi», — deyiladi postda.